وەزارەتی بەرگریی تورکیا ڕایگەیاندووە، بە وردی چاودێریی پرۆسەی تێکەڵکردنی هێزەکانی سووریای دیموکرات (هەسەدە) بە سوپای سووریا دەکەن، هاوکات پرۆسەی چەکداماڵین و هەڵوەشاندنەوەی پارتی کرێکارانی کوردستان (پەکەکە)یش بە هەستیارییەوە بەڕێوە دەبەن.
سەرچاوەکانی وەزارەتی بەرگریی تورکیا بە ڕۆژنامەنووسانیان ڕاگەیاندووە، بە گوێرەی داواکارییەکانی حکومەتی سووریا، لە چالاکییەکانی ڕاهێنان، ڕاوێژکاری و پشتگیریی تەکنیکی بە ئامانجی بەرزکردنەوەی توانای بەرگریی سووریا بەردەوامن. ئەوان دەشڵێن، وەک تورکیا بە وردی و هەستیارییەوە چاودێریی پرۆسەی تێکەڵکردنی هێزەکانی هەسەدە بە سوپای سووریا دەکەن. هاوکات، ئاماژەیان بەوەدا کە پرۆسەی چەکداماڵین و هەڵوەشاندنەوەی پەکەکە بە وردبینییەکی زۆرەوە لەلایەن دامەزراوە پەیوەندیدارەکانی دەوڵەتەکەیانەوە بەڕێوە دەبرێت و چاودێری دەکرێت.
