دوای سێ مانگ لە ڕفاندنی سێ گەنجی خەڵکی کۆبانی لەلایەن چەکدارانی سەر بە تورکیاوە، ڕوانگەی سووری بۆ مافەکانی مرۆڤ ڕایگەیاند کە ئەو گرووپە چەکدارە لە بەرانبەر ئازادکردنیاندا داوای ١٠ هەزار دۆلاری ئەمریکی لە خێزانەکانیان دەکەن.
بەپێی ڕاپۆرتی ڕوانگەی سووری بۆ مافەکانی مرۆڤ، سێ گەنجی کورد کە هەرسێکیان برای یەکترن، سێ مانگ لەمەوبەر لە بازگەیەکی گرووپی حەمزات لە نێوان حەلەب و کۆبانێ لەلایەن چەکدارانی ئەو گرووپەوە دەستگیر کرابوون. ئێستا ئەو گرووپە چەکدارە داوای بڕی ١٠ هەزار دۆلار دەکەن بۆ ئەوەی ئازادیان بکەن.
لە ڕووداوێکی دیکەدا، لە ١٧ی تشرینی یەکەمی ڕابردوودا، دوو کەسی دیکە لەلایەن چەکدارانی سەر بە هێزەکانی وەزارەتی بەرگریی حکومەتی کاتیی سووریاوە لە بازگەیەکی گەڕەکی شێخ مەقسوود دەستگیر کران و تا ئێستا چارەنووسیان نادیارە.
