ئاژانسی ڕۆیتەرز بڵاوی کردووەتەوە کە ئەمریکا ئامادەکاری دەکات بۆ جێگیرکردنی هێزەکانی لە بنکەیەکی سەربازیی ئاسمانیی نادیار لە دیمەشقی پایتەختی سووریا، بە ئامانجی پشتگیریکردنی ڕێککەوتنێکی ئەمنیی لە نێوان ئیسرائیل و حکوومەتی گواستنەوەی سووریا و چاودێریکردنی ڕەوشی باشووری سووریا.
بەپێی ڕۆیتەرز، ئەو بنکەیە دەکەوێتە دەروازەی ناوچەکانی باشووری دیمەشق و ئێستا دانوستاندن لەسەر ڕەوشی ئەو بنکەیە دەکرێت بۆ ئەوەی ببێتە بەشێک لە ناوچەیەکی بێچەک. لە لایەکی دیکەوە، بەرپرسێکی سەربازیی ڕۆژاوایی ڕایگەیاند کە لە ماوەی دوو مانگی ڕابردوودا، وەزارەتی بەرگریی ئەمریکا (پێنتاگۆن) ئامادەکارییەکانی خێراتر کردووە و چەند گەڕێکی چاودێریی لە بنکەکەدا ئەنجام داوە. لە لای خۆیەوە، بەرپرسێکی وەزارەتی بەرگریی سووریا ئاشکرای کردووە کە بە ئامانجی تاقیکردنەوەی فڕۆکەکانی گواستنەوەی سەربازیی ئەمریکی لە جۆری سی-١٣٠، ئەو فڕۆکانە لەو بنکەیە نیشتوونەتەوە، بەڵام هێشتا کاتی جێگیربوونی سەربازانی ئەمریکی دیار نەکراوە.