رۆشنبیرێكی كوردستان كە كادیرێكی دیاری پارتی دیموكراتی كوردستانیشە، باس لە سەركەوتنی پارتی لە هەڵبژاردنی خولی شەشەمی پەرلەمانی عێراق و بەدەستهێنانی كورسیی كۆتای پێكهاتەكان دەكات و رایدەگەیەنێت كە هیچ حزبێك بەقەد پارتی نوێنەرایەتیی پێكهاتەكانی بەدەست نەهێناوە.
ئاسۆ كەریم، نووسەر و سیاسەتمەدار، لە پێگەی خۆی لە تۆڕی كۆمەڵایەتیی (فەیسبووك) نووسینێكی بە ناونیشانی (پارتی وەكوو حزبێكی كوردستانی و گەلی كوردستان بە هەموو پێكهاتەكانیەوە) بڵاو كردەوە و رایگەیاند: ”پارتی سەرباری ئەوەی كە حزبێكی سەروو ملیۆنییە (1,099,826) لە عێراقدا، بە هەق حزبێكی كوردستانیی فرە پێكهاتە و فرە ڕەنگیشە.“
ڕوونیشی كردەوە: ”پارتی لەم هەڵبژاردنەی 2025دا توانیی كورسیی پەرلەمانی لە (دهۆك: 9)، (هەولێر: 9 تا 10)، (سلێمانی: 2)، (مووسڵ: 5)، (كەركووك: 1)، (خانەقین: 1)، سێ كۆتای كریستیان لە (دهۆك، هەولێر، كەركووك)، كۆتای ئێزدی لە (مووسڵ)، كۆتای فەیلی لە (كوت) بباتەوە.“
ڕوونیشی كردەوە: ”پارتی توانی نوێنەرایەتیی پەرلەمانی لە پارێزگاكانی هەرێمی كوردستان و لە ناوچە كوردستانییەكان و كۆتای پێكهاتەكانی (فەیلی، ئێزدی و كریستیان) بباتەوە كە تا ئێستا هیچ حزبێكی دیكە ئەو نوێنەراتییە فرەوانەی (كورد، عەرەب، كریستیان، فەیلی و ئێزدی) بەدەست نەهێناوە.“
لە كۆتاییشدا نووسیویەتی: ”بەو نوێنەرایەتیكردنەی پارتی دڵخۆشم، بەڵام بۆ كەركووك دڵتەنگم كە نەمانتوانی (ئێمە و یەكێتی و…) نیوەی كورسییەكانی ئەو پارێزگا كوردستانییە بەدەست بهێنین، مخابن.“