وەزیری دەرەوەی تورکیا، هاکان فیدان، ڕایگەیاند گفتوگۆکانیان لەگەڵ ئەمریکا دەربارەی تێوەگلانی هێزەکانی سووریای دیموکرات (هەسەدە) لە سوپای سووریا بەردەوامن. ئەمەش لە کاتێکدایە کە سەرۆکی پێشووی ئەمریکا، دۆناڵد ترەمپ، بەڵێنی هەڵگرتنی گەمارۆ سەربازییەکانی سەر تورکیای دابوو.
هاکان فیدان لە لێدوانێکیدا بۆ کەناڵێکی تورکیا گوتیی، لە کۆبوونەوەی لەگەڵ سەرۆکی ئەمریکادا، گەمارۆ سەربازییەکانی سەر تورکیاش هاتبوونە ڕۆژەڤ و ترەمپ بەڵێنی هەڵگرتنی گەمارۆکانی کاتسا (CAATSA)ی دابوو. ترەمپ گوتبووی، نابێت بابەتێکی وا لە نێوان دوو وڵاتی هاوپەیماندا هەبێت.
فیدان هەروەها گوتیی، لەگەڵ ئەمریکادا تێوەگلانی هێزەکانی سووریای دیموکرات (هەسەدە) بۆ نێو سوپای سووریا گفتوگۆیان کردووە و ئەوان دەیانەوێت هەموو هەڕەشەکانی سەر یەکپارچەییی خاکی سووریا و داگیرکاریی کۆتاییان پێ بێت. ڕایگەیاند، ئەوان گرینگییەکی زۆر دەدەنە کۆبوونەوەکانی نێوان دیمەشق و هێزەکانی سووریای دیموکرات (هەسەدە). هەرچەندە دوای هێرشەکانی ئیسرائیل لە گفتوگۆکاندا پچڕانێک دروست بووە، ئێستا ئەمریکا و تورکیا گرینگی دەدەنە کۆبوونەوەی لایەنەکان و دەیانەوێت ئیسرائیل بۆ سووریا و سووریاش بۆ ئیسرائیل نەبنە هەڕەشە. فیدان جەختیشی کردەوە، بوونی تورکیا لە سووریا زۆر ئاساییە و بوونی تورکیا لە سووریا لە بەرژەوەندیی هەموو لایەنەکاندایە.
تورکیا هێزەکانی سووریای دیموکرات (هەسەدە) بە درێژکراوەی پارتی کرێکارانی کوردستان (پەکەکە) دەزانێت و وەک هەڕەشەیەکی ئەمنی سەیریان دەکات، لە کاتێکدا ئەمریکا وەک هاوپەیمانێکی سەرەکیی خۆی لە شەڕی دژی ڕێکخراوی “دەوڵەتی ئیسلامی” (داعش) پشتیوانیی لێ دەکات. ئەم گفتوگۆیانە لە کاتێکدان کە سووریا لە دۆخێکی ئاڵۆزی سیاسی و ئەمنیدایە و چەندین هێزی ناوچەیی و نێودەوڵەتیی تێدایە.
