لە ئەمڕۆوە فەرمانگەی میدیا و زانیاری حکومەتی هەرێمی کوردستان داتا و زانیاری پێویست بۆ هەموو ئەو ڕۆژنامەنووسانە بەردەست دەخات کە لە بوارە جیاوازەکان پێویستیانە و چەناڵی “خزمەتی هەواڵ” بۆ رۆژنامەنووسان رادەگەیەنێت.
لەوبارەیەوە هێما نیازی، بەڕێوەبەری سۆشیال میدیای فەرمانگەی میدیا و تەکنۆلۆجیای زانیاری وتی، چەناڵێکی پێشکەوتوومان دروستکردووە بە ناوی “خزمەتی هەواڵ” لەلایەن (کۆمپانیای مێتا) ڤێریفا یان پشتڕاستکراوەی بۆ کراوە. ئەم چەناڵە تەنیا بۆ رۆژنامەنووسانە و ئەمڕۆ دووشەممە رادەگەیێنرێت.
هێما نیازی دەشڵێت: رۆژانە داتا و زانیاری پێویست بۆ رۆژنامەنووسان بەردەست دەخرێت، لەهەمان کاتدا، ئەگەر رۆژنامەنووسێک پێویستی بە داتا و زانیاری بێت لەلایەن فەرمانگەی تەکنۆلۆجیای زانیاری و لە رێگای ئیمەیڵەوە زانیاریەکەی پێ دەدرێت.
ئەم هەنگاوەی فەرمانگەی تەکنۆلۆجیای زانیاری لە پێناو بەرەوپێشبردنی شەفافیەت، پێدانی زانیاری فەرمی و ورد و هەنگاوێکیشە بۆ پاراستنی هاونیشتمانیان لە زانیاری ناڕاست.
لەسەر ئاستی جیهان و لە وڵاتانی دیموکراسی، حکومەت زانیاری پێویست بۆ رۆژنامەنووسان بەردەست دەخات، ئەمەش لەپێناو بەرگرتن لە هەواڵی ناڕاست و پێشخستنی شەفافیەت لە ڕێگای پێدانی زانیاری دروست و فەرمی.