سوپای ئیسرائیل ڕۆژی پێنجشەممە، ٤ی کانوونی یەکەمی ٢٠٢٥، ڕای گەیاند کە پاشماوەی یەکێک لە دوا بارمتەکانی غەززەی ناسیوەتەوە و ڕادەست کراوە، کە هاووڵاتییەکی تایلەندایی بووە. ئەمە لە کاتێکدایە کە حەماس هەموو بارمتە زیندووەکانی بە پێی ڕێککەوتنی ئاگربەست ئازاد کردووە، بەڵام پرۆسەی ڕادەستکردنەوەی تەرمی بارمتە کوژراوەکان بە خاوی بەردەوامە.
سوپای ئیسرائیل لە بەیاننامەیەکییدا گوتوویەتی: “دوای تەواوکردنی پرۆسەی ناسینەوە… نوێنەرانی هێزەکانی بەرگریی ئیسرائیل (IDF) لەگەڵ وەزارەتی دەرەوە، خێزانی سودتتیساک ڕینتاراڵکیان ئاگادار کردەوە کە تەرمی ناوبراو بۆ ناشتن گەڕێندراوەتەوە.” بە پێی ڕاپۆرتی سوپا، سودتتیساک ڕینتاراڵک لە ٧ی تشرینی یەکەمی ٢٠٢٣ (ڕۆژی هێرشە کوشندەکەی حەماس بۆ سەر ئیسرائیل) کوژراوە و تەرمەکەی گواستراوەتەوە بۆ کەرتی غەززە و لەوێ پارێزراوە. ئەو لە کاتی مردنیدا تەمەنی ٤٢ ساڵ بووە و لە کەرتی کشتوکاڵدا کارمەند بووە.
بە پێی قۆناغی یەکەمی ڕێککەوتنێک کە بە نێوەندگیریی ئەمریکا بە دەست هات، میلیشیا فەلەستینییەکان دوا بیست بارمتەی زیندوویان ڕادەست کردووە و تا ئێستا تەرمی ٢٧ کەس لە ٢٨ بارمتەکەیان گەڕاندووەتەوە. تەنها بارمتە گیانلەدەستدراوەکەی کە هێشتا ڕادەست نەکراوە، هاووڵاتییەکی ئیسرائیلییە. لە بەرانبەردا، ئیسرائیل نزیکەی دوو هەزار زیندانیی فەلەستینیی ئازاد کردووە و تەرمی سەدان فەلەستینیی گیانلەدەستدراویشی ڕادەست کردووە.
ئەم بابەتە لە کاتێکدایە کە ئاگربەستێک بە نێوەندگیریی ئەمریکا لە نێوان ئیسرائیل و حەماسدا هێشتا ناسکە و هەردوو لا یەکتری بە پێشێلکردنی مەرجەکانی تۆمەتبار دەکەن. لە هێرشی ٧ی تشرینی یەکەمی ٢٠٢٣ی ڕێکخراوی تیرۆریستیی حەماس بۆ سەر ئیسرائیل، ٢٥١ کەس بە بارمتە گیران و ١٢٢١ کەسیش کوژران. ئەم هێرشە بووە هۆی دەستپێکردنی جەنگێکی وێرانکەر. هێرشەکانی تۆڵەسەندنەوەیی ئیسرائیل بۆ سەر غەززە تا ئێستا لانیکەم ٧٠ هەزار و ١١٧ کەسی گیانیان لە دەست داوە. ئەمە ئامارێکە کە بەڕێوەبەرایەتیی تەندروستیی غەززە، کە لە ژێر کۆنترۆڵی حەماسدایە، بڵاوی کردووەتەوە و نەتەوە یەکگرتووەکانیش بە جێی متمانەی دەزانێت.