سەرۆکایەتیی شارەوانیی کەلار ڕایگەیاند، بە مەبەستی خۆپارێزی و ڕێگریکردن لە مەترسییەکانی لافاو، بە هاوکاریی ئیدارەی گەرمیان و هەردوو بەڕێوەبەرایەتیی ئاودێریی گەرمیان و بەڕێوەبەرایەتیی گشتیی شارەوانییەکان، دەستیان کردووە بە هەڵمەتێکی چاکسازی بۆ ڕێکخستنەوەی بەربەستەکانی لافاو.
بەپێی ڕاگەیەندراوەکەی سەرۆکایەتیی شارەوانی، کارکردن لەو پڕۆژەیەدا لە دەرەوەی شاری کەلار و بەدیاریکراوی لە نزیک گوندی سەید خەلیل چڕ کراوەتەوە.
لە هەڵمەتەکەدا تیمەکان هەڵدەستن بە ڕێکخستنەوە، بەهێزکردن و توندوتۆڵکردنەوەی ئەو بەربەستانەی کە بۆ ڕێگریکردن لە لافاو دروست کراون، تاوەکو مەترسی لەسەر ناوچەکە و هاووڵاتییان دروست نەبێت.