ڕوانگەی ئیکۆ مووچەی سێ سەرۆکایەتییەکەی عێراقی ئاشکرا کرد
ڕۆژی شەممە، 31-1-2026، ڕوانگەی “ئیکۆ عێراق” ئامارێکی شۆککەری بڵاوکردەوە و ڕایگەیاند کە مووچەی سێ سەرۆکایەتییەکەی عێراق (سەرۆکایەتی کۆمار، پەرلەمان و ئەنجومەنی وەزیران) نزیکەی ١١.٥٪ی کۆی گشتیی مووچەی فەرمانبەرانی دەوڵەت پێکدەهێنێت، و ئەو مووچانەی بە “بەرز و بێ پاساو” وەسف کرد بەراورد بە هاووڵاتیی ئاسایی.
ڕوانگەکە لە بەیاننامەیەکدا ڕوونی کردەوە: “کۆی گشتیی مووچەی فەرمانبەرانی دەوڵەت تا مانگی تشرینی دووەمی ٢٠٢٥، گەیشتووەتە نزیکەی ٥٦ ترلیۆن دینار.”
سەبارەت بە وردەکاریی مووچەی سەرۆکایەتییەکان، ئاماژەی بەوە داوە: “مووچەی ئەنجومەنی وەزیران نزیکەی ٥.٩ ترلیۆن دینار، ئەنجومەنی نوێنەران ٠.٥ ترلیۆن دینار و سەرۆکایەتی کۆمار ٠.٠٤ ترلیۆن دینار بووە. بەمەش کۆی مووچەی هەر سێ سەرۆکایەتییەکە دەگاتە ٦.٤٦ ترلیۆن دینار.”
بەهەدەردانی سامانی گشتی
ڕوانگەی ئیکۆ پێی وایە: “ئەم خەرجییە خەیاڵییانەی سەرۆکایەتییەکان لەسەر حساب و پشکی ئەو خزمەتگوزارییە گشتییانەیە کە هاووڵاتی بە شێوەیەکی راستەوخۆ پێویستییەتی، ئەمەش بە جۆرێک لە بەهەدەردانی سامانی گشتی دادەنرێت.”
ڕوانگەکە دەشڵێت: “ئەم دامەزراوانە (سەرۆکایەتییەکان) ڕاستەوخۆ خزمەتگوزاری پێشکەش ناکەن و هاووڵاتی هەست بە خزمەتەکانیان ناکات، لەکاتێکدا ملیۆنان فەرمانبەر لە بەرامبەر کارە ڕۆژانەکانیاندا مووچەیەکی کەم وەردەگرن.”
لە بەیاننامەکەدا هاتووە کە بەردەوامبوونی ئەم دۆخە ڕەنگدانەوەی کەلێنێکی ڕوونە لە ئەولەویەتەکانی خەرجیی حکومەت و نیشانەی پرسیاری گەورە دەخاتە سەر دادپەروەری لە دابەشکردنی داهاتە گشتییەکاندا.