وەزیری دادی تورکیا ڕایگەیاند چاودێریی چەکدانانی پەکەکە دەکەن و لەم پرسەدا پێشکەوتنی بەرچاو بەدی هاتووە.
یڵماز تونچ، وەزیری دادی تورکیا، ئاماژەی بەوە کرد دامەزراوە پەیوەندیدارەکانیان بەدواداچوون بۆ پڕۆسەی چەکدانانی پەکەکە دەکەن. ناوبراو گوتیشی: کاتێک دەڵێن پڕۆسەی “تورکیای بێ تیرۆر”، مەبەستیان ئەوەیە ڕێکخراوە چەکدارەکانی نێوخۆی وڵاتەکەیان و وڵاتە دراوسێکانیان چەک دابنێن. هەروەها باسی لەوە کرد لەم ئاراستەیەدا پێشکەوتنی بەرچاو بەدی هاتووە و بەردەوامیشە.
وەزیرەکەی تورکیا ڕوونی کردەوە، لە ماوەی ساڵ و نیوێکی ڕابردوودا، بەو وتارەی دەوڵەت باخچەلی لە پەرلەماندا پێشکەشی کرد و بەو ئیرادەیەی سەرۆککۆمار نیشانی دا، دەستیان بە پڕۆسەی “تورکیای بێ تیرۆر” کردووە. تونچ بانگەشەی ئەوەی کرد لەم پڕۆسەیەدا ڕێکخراوی پەکەکە بڕیاری هەڵوەشاندنەوەی خۆی داوە و دامەزراوەکان و دەسەڵاتە پەیوەندیدارەکانی دەوڵەت چاودێری و بەدواداچوون بۆ پڕۆسەی چەکدانانەکە دەکەن.
یڵماز تونچ جەختی کردەوە کاتێک دەڵێن “تورکیای بێ تیرۆر”، مەبەستیان ئەوەیە تەنیا بە دانانی چەکی هەموو توخمە چەکدارەکان، چ لە ئاستی ناوخۆ و چ لە ئاستی دەرەوە و گەیشتن بە ناوچەیەکی دوور لە گرژی، دەتوانن بە متمانەوە سەیری داهاتوو بکەن. لە کۆتاییدا گوتی: کاتێک وڵاتەکەمان ئازاد بوو، “سەدەی تورکیا” بە ئاسانی و خێراتر بنیات دەنرێت.