لە بەیاننامەیەکی هاوبەشی نێوان تورکیا و سعوودیەدا، جەخت لە هاوکارییە ستراتیژییەکانی نێوان هەردوو وڵات بۆ چارەسەری کێشەکانی ناوچەکە کرایەوە. دوای سەردانی فەرمیی ڕەجەب تەیب ئەردۆغان، سەرکۆماری تورکیا و دیدار و کۆبوونەوەی لەگەڵ محەمەد بن سەلمان، شازادەی جێنشینی سعوودیە و بەرپرسانی ئەو وڵاتە، ڕاگەیاندراوێکی هاوبەش بۆ ڕای گشتی بڵاو کرایەوە.
لە ڕاگەیاندراوەکەدا جەخت لە هاوکارییەکانی هەردوو وڵات و هەڵوێستی هاوبەش بەرامبەر بە گۆڕانکارییەکان کراوەتەوە. سعوودیە و تورکیا باسیان لە پرسەکانی ناوچەکە و لەنێویاندا دۆخی سووریا کردووە؛ هەروەها پشتیوانیی خۆیان بۆ هەوڵەکانی سووریا لەپێناو پاراستنی سەقامگیری و یەکپارچەیی خاکی ئەو وڵات دەربڕیوە و هێرشەکانی ئیسرائیلیان ئیدانە کردووە.
هەروەها هەوڵەکانی کۆمەڵگەی نێودەوڵەتییان بۆ پاڵپشتی لە حکومەتی سووریا و هەڵگرتنی سزا سەپێنراوەکان بەرز نرخاند. هەردوولا پشتگیرییان لە جێبەجێکردنی ڕێککەوتنی ئاگربەست و یەکگرتن کرد کە لە ٣٠ی کانوونی دووەم ڕاگەیەندرا، هاوکات پشتیوانیی تەواوی خۆیان بۆ هەوڵەکانی حکومەتی سووریا بۆ بەرەنگاربوونەوەی ئەو ڕێکخراوە تیرۆریستییانەی کە هەڕەشە لە سەقامگیریی سووریا و تەواوی ناوچەکە دەکەن، دووپات کردەوە.