داتاکانی وەزارەتی ڕۆشنبیری و گەشتیاریی تورکیا ئاشکرایان کرد کە زیاتر لە ملیۆنێک گەشتیاری عێراقی لە ساڵی 2025دا ڕوویان لە تورکیا کردووە؛ ئەمەش بەرزبوونەوەیەکی ڕوون نیشان دەدات بەراورد بە ساڵی 2024، لەگەڵ بەردەوامیی پێشەنگیی عێراق لە لیستی ئەو وڵاتە عەرەبییانەی زۆرترین گەشتیار دەنێرن بۆ تورکیا.
بەپێی داتاکانی وەزارەتەکە، ملیۆنێک و 31 هەزار و 257 گەشتیاری عێراقی لە ساڵی 2025دا سەردانی تورکیایان کردووە. ئەم ژمارەیە زیادبوونێکی بەرچاوی بە ڕێژەی 6.44% بەراورد بە ساڵی 2024 تۆمار کردووە، بەڵام بە ڕێژەی 1.55% کەمتر بووە لە ساڵی 2023.
ڕیزبەندی وڵاتانی عەرەبی
ئامارەکان ئاماژە بەوە دەکەن کە عێراق پێگەی یەکەمی خۆی لەسەر ئاستی وڵاتانی عەرەبی پاراستووە، کە لە ساڵی 2023وە ئەو شوێنەی گرتووە. عێراق پێش چەندین وڵاتی عەرەبی کەوتووە، لەوانە:
• عێراق: زیاتر لە 1 ملیۆن گەشتیار.
• سعوودیه: 921 هەزار گەشتیار.
• جەزائیر: 343 هەزار گەشتیار.
• ئوردن: 281 هەزار گەشتیار.
ئامارە مانگانەکان بەردەوامیی ئەم پێشکەوتنە لە ساڵی 2025دا نیشان دەدەن، بە شێوەیەک کە عێراقییەکان لە چەندین مانگی ساڵەکەدا (لەوانە مانگی کانوونی یەکەم) لە سەرووی لیستی گەشتیارانی عەرەب بوون، ئەمەش ڕەنگدانەوەی گەشەکردنی جووڵەی گەشتوگوزار و گەشتیارییە لە نێوان هەردوو وڵاتدا.