ئەمڕۆ سێشەممە 2026.2.17، ئومێد خۆشناو، پارێزگارى هەولێر، لە دیوانى پارێزگا، پێشوازیی لە شاندێکى باڵاى ئاژانسی جایكای ژاپۆنی کرد، بە سەرۆكایەتی ” تاكێتسورو ئیكۆ ” جێگری بەڕیوەبەری ئاژانسی ناوبراو لە عێراق و هەرێمی كوردستان.
لە سەرەتای دیدارەکەدا، گفتوگۆ لە بارەى “پڕۆژەى ریسایکلینى ئاوى قورسى هەولێر” و چارەسەرکردنی گرفتی ئاوەڕۆکانی شاری هەولێر كرا، کە قۆناغی یەكەمی بە گوژمەى ( 288 ملیۆن دۆلار ) لەلایەن ئاژانسى جایکاى ژاپۆنى لەو نزیكانە دەست بە جێبەجێكردنی دەكرێت بۆ چارەسەرکردنی گرفتی ئاوی ئاوڕۆکان، پڕۆژەکە یەکێکە لە پڕۆژە ستراتیژیی و گرنگەکانی حكومەتی هەرێم و گەورەترین پڕۆژەی ژێرخانی ژینگەیی لە پایتەختی هەرێمی کوردستان، لە قۆناغى یەکەمی پڕۆژەكە بە درێژی ( 75 کیلۆمەتر ) ئەنجام دەدرێت و ئەو ئاوەی كە لە ماڵان بەفیڕۆدەچێت جارێكی دیكە خاوێن دەكرێتەوە و بەكار دەهێندرێتەوە بۆ پارك و باخچەكان و ئاوەڕۆكانیش بە شێوەیەكی سەردەمیانە دروست دەكرێت، وا بڕیاریشە دوای قۆناغی یەكەمی پڕۆژەكە قۆناغی دووەمی بە گوژمەی ( 300 ملیۆن دۆلار ) دەست بە جێبەجیكردنی بكرێت، سوودەكانی ئەو پڕۆژەیە جگە لەکەمکردنەوەی پیسبوونی ژینگە، ڕێگری لە تێکەڵبوونی ئاوی ئاوەڕۆ بە زێی گەورە و ئاوی ژێرزەوی دەکات و بۆ ئاودانی دار و درەختەکانی دەوروبەری هەولێریش وەك پشتێنەیی سەوزایی بەکاردێت.
لەوبارەیەشەوە پارێزگارى هەولێر، كارەكانی ئاژانسی ناوبراوی بەرز نرخاند و سوپاسی حكومەتی ژاپۆن و ئاژانسی جایكای كرد کە لە ئێستا و رابردوودا هاوكاری دامودەزگەكانی حکومەتى هەرێمى کوردستان بوونە و بەردەوامن لە هاوكارییەكانیان، هەروەها تیشکى خستەسەر ئەوەى کە بەشێوەیەکى گشتیى هەمیشە هەنگاوەکانى وڵاتى ژاپۆن و ئاژانسى جایکا بۆ ئەنجامدانى پڕۆژە خزمەتگوزارییەکان بەرز دەنرخێنین، لە ماوەى ڕابردووشدا لە بوارى ئاو و ئاوەڕۆ و خزمەتگوزاری دیكەدا چەندین پڕۆژەیان ئەنجامداوە.
هەروەها گوتى: “لە چوارچێوەی سیاسەتی حكومەتی هەرێمی كوردستان، خوازیارى ئەوەین ئەو هەماهەنگى و هاوکارییەى لە نێوان هەرێمى کوردستان و وڵاتى ژاپۆن هەیە زیاتر بەرەوپێش بچێت و دەخوازین بەهەماهەنگى یەکتر و سودوەرگرتن لە توانای پسپۆڕانی وڵاتی ژاپۆن پڕۆژەی خزمەتگوزارى زیاتر جێبەجێبكرێت و دەرفەتی زیاتریش بۆ كاركردنی كۆمپانیا ژاپۆنیەکان لە هەرێمى کوردستان بڕەخسێندرێت و زیاتر پەرە بەپەیوەندییەکانى نێوان هەردوولا بدرێت”.
