ئیبتیسام هیلالی، پەرلەمانتاری فراکسیۆنی دەوڵەتی یاسا جەختی کردەوە کە جووڵەیەک لە ناو ئەنجومەنی نوێنەراندا هەیە بۆ کۆکردنەوەی واژۆ بە مەبەستی زیادکردنی بڕگەیەک بۆ کارنامەی کۆبوونەوەی داهاتوو، تاوەکو تێیدا تەوەری زیادبوونی ڕەسمی گومرگی لەسەر هاوردەکاران تاوتوێ بکرێت.
هیلالی بە شەفەق نیوزی ڕاگەیاندووە کە بڕیارەکانی “حکومەتی کاربەڕێکەر” کاریگەری ڕاستەوخۆیان لەسەر هاوڵاتییان هەبووە، بەتایبەتی لە مانگی ڕەمەزاندا؛ ئاماژەی بەوەش کردووە کە بەرزبوونەوەی نرخ لە کاڵا خۆراکی و بەکاربەرییەکان، جگە لە ئامێرە کارەباییەکان و کەلوپەل و شمەکەکانی دیکەدا بەدی دەکرێت.
هەروەها وتی: “پێویستە ئەنجومەنی نوێنەران ڕۆڵی ڕاستەقینەی یاسادانان و چاودێری خۆی وەک نوێنەری گەل بگێڕێت” بۆ چاودێریکردنی ئەو بڕیارانەی لە حکومەتی کاربەڕێکەرەوە دەردەچن و کاریگەرییە ڕاستەوخۆکانیان لەسەر هاوردەکاران و هاوڵاتییان.
ڕوونیشیکردەوە کە سەرۆکایەتی پەرلەمان لە 8ـی شوباتدا نووسراوێکی ئاراستەی سەرۆکایەتی ئەنجومەنی وەزیران کردووە بۆ ڕاگرتنی کارکردن بە پێناسە (تعرفة) نوێیەکەی گومرگ بۆ ماوەی 90 ڕۆژ، بەڵام “هیچ وەڵامێک یان ڕاگرتنێک و دواخستنێک لەلایەن حکومەتەوە نییە بۆ دووبارە چاوخشاندنەوە بە پێناسە گومرگییە نوێیەکەدا”.
پێشتر هەیبەت حەلبووسی، سەرۆکی ئەنجومەنی نوێنەرانی عێراق، نووسراوێکی فەرمی ئاراستەی حکومەت کردبوو و تێیدا داوای کردبوو کارکردن بە بڕیاری ژمارە (957)ـی ساڵی 2025ـی ئەنجومەنی وەزیران بۆ ماوەی 90 ڕۆژ ڕابگیرێت بە مەبەستی پێداچوونەوە بە پێناسە گومرگییەکە، جگە لە جێگیرکردنی ڕێژەی 5% بۆ هەندێک لەو ماددانەی بڕیارەکە دەیانگرێتەوە.
هەروەها داوای کردووە ڕەسمی گومرگی لەسەر ئۆتۆمبێلە “هایبرید”ەکان لە 15%ـەوە بۆ 5% کەم بکرێتەوە، وەک پاڵپشتییەک بۆ ژینگە و کەمکردنەوەی بەکارهێنانی سووتەمەنی.