مەسعوود پزیشکیان، سەرۆککۆماری ئێران، لە پەیوەندییەکی تەلەفۆنیدا لەگەڵ شاباز شەریف، سەرۆکوەزیرانی پاکستان، جەختی لەوە کردەوە کە وڵاتەکەی نایەوێت وڵاتانی ناوچەکە بکاتە ئامانج. پزیشکیان ئاماژەی بەوە کرد، بەرگریکردن لە خاکەکەیان بە مافی ڕەوای خۆیان دەزانن و تەنیا هێرش دەکەنە سەر ئەو بنکانەی کە دەستدرێژییان لێوە دەکرێتە سەر ئێران. هاوکات عەباس عێراقچی، وەزیری دەرەوەی ئێران، لە پەیوەندییەکدا لەگەڵ سکرتێری گشتیی نەتەوە یەکگرتووەکان، ڕەخنەی لە بێدەنگیی ئەنجوومەنی ئاسایش گرت و داوای سەرکۆنەکردنی هێرشەکانی کرد.