محەمەد شیاع سوودانی جەختی لەوە کردەوە کە ویلایەتە یەکگرتووەکانی ئەمریکا و ئێران بە بەردەوامی ئاسمانی عێراق پێشێل دەکەن، ئاماژەی بەوەش کرد کە واشنتن لە پشت بۆردومانکردنی هێزەکانی حەشدی شەعبییەوەیە لە وڵاتدا.
سوودانی لە چاوپێکەوتنێکدا لەگەڵ ڕۆژنامەی “کۆریێری دێلا سێرا”ی ئیتاڵی ڕایگەیاند: “هیچ مەترسییەک لەسەر عێراق نییە سەبارەت بە جەنگی ناوخۆیی یان گەڕانەوەی تیرۆر، تەنها هەندێک شانەی سنووردار هەن کە ڕاوەدوو دەنرێن، بەڵام کێشەی ئێستا پێشێلکردنی ئاسمانی عێراقە لەلایەن فڕۆکە ئەمریکییەکان و موشەک و فڕۆکە بێفڕۆکەوانەکانی ئێرانەوە.”
خاڵە گرنگەکانی لێدوانەکەی سودانی:
سودانی ئاماژەی بەوە کرد کە “ویلایەتە یەکگرتووەکان هێزەکانی حەشدی شەعبی پێکاوە و بووەتە هۆی شەهید و برینداربوون، ئەمەش کارێکی بە توندی شەرمەزارکراوە.”
ڕایگەیاند کە “ئیسرائیل ئاگری جەنگ خۆش دەکات و دەبێتە هۆی کارەسات و یاسا نێودەوڵەتییەکان دەبەزێنێت، عێراقیش بە نیگەرانییەکی زۆرەوە چاودێری پەرەسەندنەکان دەکات.”
سوودانی وەک فەرماندەی گشتی هێزە چەکدارەکان جەختی کردەوە کە بەغدا دەیەوێت خۆی لە پەلکێشکردن بۆ ناو هەر ململانێیەک بپارێزێت و ناهێڵێت وڵات ببێتە مەیدانی یەکلاکردنەوەی حساباتی نێوان هێزە جیاوازەکان.
ئاماژەی بەوە کرد کە حکومەت کار بۆ چەسپاندنی سەقامگیری ناوخۆیی دەکات و دەڵێت: “پەیوەندی باشمان لەگەڵ ئێران و ویلایەتە یەکگرتووەکان هەیە، ئەمەش وامان لێدەکات بتوانین ڕۆڵی ناوبژیوان بگێڕین بۆ لێکنزیککردنەوەی دیدگای لایەنە ناکۆکەکان.”