یان برێم، کونسوڵی گشتیی فەڕەنسا لە هەرێمی کوردستان، لە پەیامێکی فەرمیدا بۆ مەسرور بارزانی، هاوسۆزی و سەرەخۆشیی خۆی و وڵاتەکەی بۆ قوربانیانی هێرشە بالیستییەکەی ئێران دەربڕی.
لە نامەکەدا کونسوڵی گشتیی فەڕەنسا ئاماژەی بەوە کردووە کە هێرشە بالیستییەکەی ئێران بۆ سەر فیرقەکانی ٥ و ٧ی هێزەکانی پێشمەرگە لە ناوچەی سۆران، کە بووەتە هۆی شەهیدبوونی ٦ پێشمەرگە و برینداربوونی ٣٠ی دیکە، کارەساتێکی دڵتەزێنە و “تاساندوونی”.
یان برێم لە پەیامەکەیدا دەڵێت: “بە ناوی خۆم و تیمەکەم و بەرپرسانی فەڕەنسییەوە، پرسە و سەرەخۆشی ئاراستەی جەنابی سەرۆکوەزیران و خێزانی قوربانییەکان دەکەم و هیوای زوو چاکبوونەوە بۆ بریندارەکان دەخوازم.”
هەروەها کونسوڵی فەڕەنسا جەختی لەوە کردووەتەوە کە وڵاتەکەی هاوسۆزی هەرێمی کوردستانە بەرامبەر بەم “کردەوە دوژمنکارانەیە” و دڵنیاییی داوەتە سەرۆکوەزیران کە فەڕەنسا بەردەوام دەبێت لە پشتیوانیکردنی هەوڵەکانی حکوومەتی هەرێم بۆ پاراستنی ئاشتی و دابینکردنی ئاسایش بۆ گەلی کورد.