ئەمڕۆ دووشەممە لەگەڵ کردنەوەی بازاڕەکانی ئاسیا نرخی نەوت بازدانێکی گەورەی بەخۆیەوە بینی ، و ئەم بەرزبوونەوەیە دوای ئەوە هات کە حوسییەکان هێرشیان کردە سەر ئیسرائیل و مەترسییان بۆ سەر ڕێڕەوە ئاوییەکان دروست کرد.
ئەمڕۆ دووشەممە لە بازاڕەکاندا نرخی بەرمیلێک نەوتی برێنتی دەریای باکوور زیاتر لە 3 دۆلار گران بوو و بە 115 دۆلار و 66 سەنت مامەڵەی پێوەکرا. هەروەها نەوتی سووکی تەکساسی ئەمریکاش 2 دۆلار و 93 سەنت بەرزبووەوە و گەیشتە 102 دۆلار و 56 سەنت.
هۆکاری سەرەکی ئەم گۆڕانکارییە دەگەڕێتەوە بۆ هەڕەشەکان لەسەر گەرووی بابولمەندەب لە دەریای سوور، ئەم گەرووە وەک جێگرەوەی تەنگەی هورمز دەبینرێت و هەر مەترسییەک لەسەری دەبێتە هۆی گرانبوونی سووتەمەنی لە جیهاندا.
جێی ئاماژەیە تەنیا لەم مانگەدا نرخی نەوتی برێنت بە ڕێژەی 59% بەرزبووەتەوە. ئەمە گەورەترین بازدانی نرخە لە ماوەی یەک مانگدا کە لە دوای 36 ساڵی رابردوو هاوشێوەی نەبووە.