ئاژانسی نێودەوڵەتیی وزەی ئەتۆم ئاشکرای کرد، وێستگەیەکی گرنگی ئەتۆمیی ئێران لەکارکەوتووە و چیتر توانای بەرهەمهێنان و پەرەپێدانی چالاکییە ئەتۆمییەکانی نییە.
ئەمڕۆ دووشەممە 2026\3\30، ئاژانسی نێودەوڵەتیی وزەی ئەتۆم (IAEA) ڕایگەیاند: کۆمەڵگەی (خونداب) بۆ ئاوی قورس لە ئێران، بەهۆی هێرشە ئاسمانییەکانی هەفتەی ڕابردووی ئیسرائیلەوە بە تەواوی پەکی کەوتووە.
ئاژانسەکە دوای شیکردنەوەی نوێترین وێنە مانگە دەستکردەکان ئاماژەی بەوە کردووە: “وێستگەی خونداب (مەفاعەلی ئاراکی پێشوو) زیانی گەورەی بەرکەوتووە و چیتر کار ناکات.”
هەروەها باسی لەوەش کردووە، لە کاتی هێرشەکەدا هیچ ماددەیەکی ئەتۆمیی لە ناو دامەزراوەکەدا نەبووە و پێشتر بۆ شوێنێکی دیکە گواستراونەتەوە.
ئاژانسەکە جەختیشی کردووەتەوە، هەرچەندە ماددەکان گواستراونەتەوە، بەڵام تەواوی کەرەستەکانی پەرەپێدان و بەرهەمهێنانی وزەی ئەتۆمی کە لە ناو وێستگەکەدا بوون و لەناوچوون.