وەزارەتی دارایی ئیسرائیل لە خەمڵاندنێکی سەرەتاییدا ڕای گەیاند شەڕی دژی ئێران نزیکەی ١١.٥ ملیار دۆلار تێچووی بۆ ئەم وڵاتە هەبووە.
بە گوتەی ئەم وەزارەتە، شەڕی نێوان ویلایەتە یەکگرتووەکان و ئیسرائیل لەگەڵ ئێراندا تێچووی ئابووریی بەرچاوی بەدوای خۆیدا هێناوە، لەوانە کەمبوونەوەی بەرهەمی نێوخۆیی و بەرزبوونەوەی خەرجییەکانی حکوومەت، بەشێکی ئەم خەرجییانەش لە داهاتوودا بەتەواوی ڕوون دەبنەوە.
بەشێکی سەرەکیی ئەم تێچووانە پەیوەندییان بە خەرجییە سەربازی و بەرگرییەکانەوە هەیە و خەرجییەکانی سوپای ئیسرائیل، وەزارەتی بەرگری، وەزارەتی ئاسایشی نێوخۆیی و دامەزراوە ئەمنییەکانی دیکە دەگرنەوە.
هەروەها تێچووی پلانەکانی قەرەبووکردنەوەی زیانەکانی حکوومەت بۆ زیانە ڕاستەوخۆکانی هێرشە مووشەکییەکان، کەمبوونەوەی چالاکیی ئابووریی کار و پیشەکان و مۆڵەتی زۆرەملێی فەرمانبەران بە نزیکەی ٤ ملیار دۆلار خەمڵێندراوە.
سەرباری ئەمەش، بەپێی ڕاگەیاندنی ئەم وەزارەتە، نزیکەی ٣٣٠ ملیۆن دۆلاریش بۆ خەرجییە مەدەنییەکان، لەوانە چالاکیی نەخۆشخانەکان، خزمەتگوزارییە فریاگوزارییەکان و خەرجییەکانی وەزارەتی کاروباری کۆمەڵایەتی خەرج کراوە.