لە کاتێکدا چاوەڕوان دەکرێت ئەمڕۆ سێشەممە گفتوگۆ ڕاستەوخۆکان لە واشنتۆن لە نێوان باڵیۆزانی لوبنانی و ئیسرائیلی بە ئامادەبوونی مارکۆ ڕووبیۆ وەزیری دەرەوەی ئەمریکا دەست پێ بکات، ئیسرائیل درێژەی بە هێرشە ئاسمانییەکانی بۆ سەر باشوور و ڕۆژهەڵاتی لوبنان دا.
پەیامنێری ئەلعەرەبییە ڕۆژی سێشەممە بڵاوی کردەوە هێرشێکی ئاسمانیی ئیسرائیل گوندی سەحمەری لە بیقاعی ڕۆژئاوا (ڕۆژهەڵاتی لوبنان) کردووەتە ئامانج.
بەپێی ئەم ڕاپۆرتە، هێرشێکی دیکە گوندی عەدلونی لە شارۆچکەی سەیدا لە باشووری لوبنان و هەروەها گوندی تێبنیینی کردووەتە ئامانج.
هاوکات سوپای ئیسرائیل ڕایگەیاند لە پێکدادانەکانی باشووری لوبناندا سەربازێک کوژراوە و ٣ سەربازی دیکەش بریندار بوون. بەم پێیەش، ژمارەی ئەفسەران و سەربازە بریندارە ئیسرائیلییەکان لە پێنجشەممەی ڕابردووەوە تاوەکوو ئێستا گەیشتووەتە ١٥٤ کەس.
هەروەها سوپای ئیسرائیل ڕایگەیاند ٣٤ ئەفسەر و سەرباز لە شەڕەکانی باشووری لوبناندا بەسەختی بریندار بوون و ٧٨ کەسیش برینەکانیان مامناوەندە.
ڕۆژی دووشەممە ئیسرائیل ڕایگەیاند کۆنترۆڵی ئۆپەراسیۆنیی تەواوی شاری بنت جوبەیلی بەدەست هێناوە، شارێک بۆ حیزبوڵڵا گرنگییەکی ڕەمزیی هەیە.
لەم بارەیەوە، ئاڤیخای ئەدرەعی گوتەبێژی سوپای ئیسرائیل جەختی کردەوە لە کاتی هێرشکردنە سەر شارەکە زیاتر لە ١٠٠ چەکداری حیزبوڵڵا کوژراون و گوتی: «هێزە ئیسرائیلییەکان خەریکی دروستکردنی پشتێنەیەکی ئەمنیی قووڵتر و پتەوترن لە باشووری لوبناندا.»
بە گوتەی سەرچاوە سەربازییەکان بۆ ئەلعەرەبییە، گەمارۆدانی شاری بنت جوبەیل لەلایەن هێزە ئیسرائیلییەکانەوە لە ٥ میحوەری جیاوازەوە ئەنجام دراوە: لە ڕۆژئاواوە (میحوەری عەین ئبل-دبل-حەنین)، لە باشوورەوە (میحوەری مارون ئەلڕاس-عەینەترون-یارون)، لە ڕۆژهەڵاتەوە (پێشڕەوی لە عەیناتاوە)، لە باکوورەوە (میحوەری کونین-ئەلتەیری و ڕەشاف-بەیت لیف) و هەروەها لەو ڕێگایانەوە دەچنەوە سەر ناوچەی سەف ئەلهەوا.
ئەم سەرچاوانە جەختیان کردووەتەوە هێزە ئیسرائیلییەکان کۆنترۆڵی ڕێگا پێکەوەبەستراوەکانی نێوان ئەم پێنج میحوەرەیان بەدەستەوە گرتووە، بە گوتەی ئەوان ئەمەش بە واتای ڕووخانی سەربازیی بنت جوبەیل دێت.
شاری بنت جوبەیل گرنگییەکی ڕەمزیی تایبەتی بۆ حیزبوڵڵا هەیە و لە بەها مەیدانی و ستراتیژییەکانیشی تێدەپەڕێت. حەسەن نەسروڵڵا سکرتێری پێشووی حیزبوڵڵا لە ٢٦ی ئایاری ٢٠٠٠دا «گوتاری ئازادکردن»ی لەم شارەدا و لە بۆنەی پاشەکشەی هێزە ئیسرائیلییەکان لە باشووری لوبنان دوای ٢٢ ساڵ داگیرکاری، پێشکەش کرد.
هەروەها نەسروڵڵا لە ڕێوڕەسمێکدا پاش شەڕی تەممووزی ٢٠٠٦ و لە چوارچێوەی «سەرکەوتن»دا بەڕێوە چوو، ئەم شارەی وەک سەکۆی گوتاربێژی بەکار هێنا و ڕستە بەناوبانگەکەی گوت و تێیدا ئیسرائیلی بە «لاوازتر لە ماڵی جاڵجاڵۆکە» وەسف کرد.
ئەم پێشهاتانە لە کاتێکدا ڕوو دەدەن ئەمڕۆ لوبنان و ئیسرائیل لە واشنتۆن و لە بارەگای وەزارەتی دەرەوەی ئەمریکا، دانوستان لە ئاستی باڵیۆزاندا بەڕێوە دەبەن، یەکەمین گفتوگۆ لەم ئاستەدا لە دەیەکانی ڕابردووەوە هەژمار دەکرێت.
لە هەمان کاتدا، ڕۆژی ڕابردوو حیزبوڵڵا داوای هەڵوەشاندنەوەی دانوستانەکانی نێوان لوبنان و ئیسرائیلی کرد و نەعیم قاسم سکرتێری گشتیی حیزبوڵڵا، ئەم گفتوگۆیانەی بە «بێهوودە» وەسف کرد.
قاسم جەختی کردەوە دەبێت «کۆدەنگی و ڕێککەوتنی لوبنانی» بۆ دەستپێکردنی دانوستانە ڕاستەوخۆکان لەگەڵ ئیسرائیلدا پێک بێت و هۆشداریی دا «هیچ کەسێک بۆی نییە وڵاتەکە بەبێ ڕێککەوتنی ناوخۆیی نێوان پێکهاتەکانی بەرەو ئەم ئاراستەیە ببات»؛ بابەتێک بە گوتەی ئەو تاوەکوو ئێستا نەهاتووەتە دی.