دوێنێ هەینی پێنتاگۆن ڕایگەیاند کە ویلایەتە یەکگرتووەکانی ئەمریکا پێنج ههزار سەرباز لە ئەڵمانیای هاوپەیمانی ناتۆ دەکێشێتەوە، ئەمەش لە کاتێکدایە کە درز و ناکۆکییەکانی نێوان سەرۆک دۆناڵد ترەمپ و ئەوروپا سەبارەت بە جەنگی ئێران قووڵتر دەبنەوە.
دوای دەمەقاڵێ لەگەڵ ڕاوێژکاری ئەڵمانیا، فریدریش مێرز، ترەمپ لە سەرەتای ئەم هەفتەیەدا هەڕەشەی کەمکردنەوەی هێزەکانی کردبوو. مێرز ڕۆژی دووشەممە ڕایگەیاندبوو کە ئێرانییەکان لە دانوستانەکان بۆ کۆتاییهێنان بە جەنگە دوو مانگییەکە سووکایەتی بە ئەمریکا دەکەن، ئاماژەی بەوەش کردبوو کە نابینێت واشنتۆن هیچ ستراتیژییەکی بۆ چۆنیەتی چوونە دەرەوە لەو جەنگە هەبێت.
بەرپرسێکی باڵای پێنتاگۆن، کە نەیویست ناوی ئاشکرا بکرێت، وتی گوتاری ئەم دواییەی ئەڵمانیا “نەگونجاو و بێ سوود” بووە. ئەو بەرپرسە وتی: “سەرۆک بە شێوەیەکی ڕەوا کاردانەوەی بەرامبەر بەم قسە ناپەسەندانە هەیە.”
پێنتاگۆن ڕایگەیاند کە چاوەڕوان دەکرێت کشانەوەکە لە ماوەی ٦ بۆ ١٢ مانگی داهاتوودا تەواو بێت. ئەڵمانیا مەکۆی نزیکەی ٣٥,٠٠٠ سەربازی چالاکی ئەمریکایە، کە زۆرترین ژمارەی سەربازی ئەمریکییە لە هەموو ئەوروپادا.
بەرپرسەکە ئاماژەی بەوە دا کە ئەم کەمکردنەوەیە ئاستی هێزەکانی ئەمریکا لە ئەوروپا دەگەڕێنێتەوە بۆ ئاستی پێش ساڵی ٢٠٢٢، واتە پێش ئەوەی هێرشی ڕووسیا بۆ سەر ئۆکرانیا ببێتە هۆی زیادکردنی هێزەکان لەلایەن سەرۆکی ئەو کاتە، جۆ بایدن.
هەروەها ئەو بەرپرسە بڕیارەکەی بەستەوە بە هەوڵەکانی ئیدارەی ترەمپ بۆ ئەوەی ئەوروپا ببێتە دابینکەری سەرەکی ئاسایش لە کیشوەرەکەدا. بەڵام لەگەڵ ئەوەشدا، ئەمە بیرهێنانەوەیەکی بەهێزی دیکەی ئامادەیی ترەمپە بۆ وەڵامدانەوەی هەر شتێک کە وەک “بێوەفایی” لەلایەن هاوپەیمانانەوە بیبینێت.
reuters