ئاژانسی هەواڵی ڕۆیتەرز لە ڕاپۆرتێکی تایبەتدا، پەردەی لەسەر وەرچەرخانێکی مەترسیدار لە ململانێکانی ڕۆژهەڵاتی ناوەڕاست لادا و ڕایگەیاند، عەرەبستانی سعوودیە بۆ یەکەمجار لە مێژوودا بە شێوەیەکی ڕاستەوخۆ و نهێنی، هێرشی سەربازی کردووەتە سەر ئامانجەکانی ناو خاکی ئێران.
هێرشی وەڵامدەرەوە
بەپێی زانیارییەکانی ڕۆیتەرز کە لە دوو بەرپرسی ڕۆژئاوایی و دوو بەرپرسی ئێرانییەوە دەستی کەوتووە، هێزی ئاسمانی سعوودیە لە کۆتاییەکانی مانگی ئازاری ڕابردوودا، چەندین هێرشی چڕیان بۆ سەر خاکی ئێران ئەنجامداوە. ئەم هێرشانە وەک وەڵامدانەوەیەک بووە بۆ ئەو هێرشە موشەکی و درۆنانەی کە ئێران لە میانی جەنگە نوێیەکەی ناوچەکەدا کردبوویە سەر ژێرخانی ئابووری و ئاسمانی سعوودیە.
وەرچەرخان لە ستراتیژیی ڕیاز
ئەم هەنگاوەی سعوودیە بە “بوێرانەترین” کردەی سەربازی ئەو وڵاتە دادەنرێت بەرامبەر ڕکابەرە مێژووییەکەی. لە کاتێکدا پێشتر سعوودیە بۆ پاراستنی خاکەکەی پشتی بە “چەتری بەرگری ئەمریکا” دەبەست، بەڵام تێپەڕبوونی ١٠ هەفتە بەسەر جەنگەکەدا و ئامانجگیرانی بەردەوامی سعوودیە لەلایەن ئێرانەوە، وای کردووە ڕیاز ڕاستەوخۆ دەست بوەشێنێت.
جەنگێکی فراوانتر لەوەی دەبینرێت
ڕاپۆرتەکە ئاماژە بەوە دەکات کە جەنگەکە لە ٢٨ی شوباتی ٢٠٢٦، دوای هێرشە ئاسمانییەکانی ئەمریکا و ئیسرائیل بۆ سەر ئێران دەستی پێکردووە. لەو کاتەوە، تاران شەش وڵاتی ئەنجومەنی هاریکاری کەنداوی کردووەتە ئامانج و گەرووی هورمزی داخستووە.
تەنها سعوودیە نەبووە کە وەڵامی داوەتەوە؛ بەپێی ڕاپۆرتەکەی “وۆڵ ستریت جۆرناڵ” کە لەم هەواڵەدا ئاماژەی پێکراوە، میرنشینە یەکگرتووە عەرەبییەکانیش (ئیمارات) هێرشی سەربازییان کردووەتە سەر ئێران، بەڵام جیاوازییەکە لەوەدایە کە سعوودیە هێشتا دەیەوێت دەرگای دیپلۆماسی بە کراوەیی بهێڵێتەوە بۆ ڕێگریکردن لە تەقینەوەی تەواوەتی دۆخەکە.
هەڵوێستی فەرمی
بەرپرسێکی باڵا لە وەزارەتی دەرەوەی سعوودیە، بێ ئەوەی بە ڕاستەوخۆ دان بە ئەنجامدانی هێرشەکاندا بنێت، ڕایگەیاندووە: “شانشینی سعوودیە جەخت لەسەر هەڵوێستی نەگۆڕی خۆی دەکاتەوە بۆ هێورکردنەوەی گرژییەکان و پاراستنی سەقامگیری ناوچەکە.” لای خۆشییەوە تاران تا ئێستا هیچ لێدوانێکی فەرمی لەسەر ئەم هێرشە نهێنییانە نەداوە.
کاریگەرییە ئابوورییەکان
بەهۆی ئەم پێکدادانە سەربازییانە و داخستنی ڕێڕەوە ئاوییەکان، تێچووی گواستنەوەی دەریایی بە شێوەیەکی بەرچاو بەرزبووەتەوە، بەجۆرێک کە نرخی سووتەمەنی ئێستا ٧٠٪ بۆ ٨٠٪ی تێچووی کارپێکردنی کەشتییە بازرگانییەکان پێکدەهێنێت، ئەمەش هەڕەشەیەکی جیدییە بۆ سەر ئابووری جیهان.
سەرچاوە: ڕۆیتەرز