ئەمڕۆ پێنجشەممە، ٢٨ـی ئایاری ٢٠٢٦، لەگەڵ بەردەوامیی مامەڵەکان لە بازاڕەکانی وزەدا، نرخی نەوت نیشتنەوەی زیاتری بەخۆوە بینی و بەراورد بە نرخەکانی دوێنێ کەمێک چوونە دواوەی تۆمار کرد.
بەپێی دواین نوێکردنەوەکانی بازاڕ، نرخی هەر بەرمیلێک نەوتی خاوی برێنت گەیشتووەتە 96.96 دۆلار، کە بەراورد بە ئامارەکانی دوێنێ (97.41 دۆلار) بە بڕی 45 سەنت دابەزیوە. هاوكات، نرخی هەر بەرمیلێک نەوتی خاوی سووکی تەکساسی ئەمریکیش ڕووی لە دابەزین کرد و گەیشتە 91.07 دۆلار، کە ئەمەش بەراورد بە کاتی پێشوو (91.34 دۆلار) کەمبوونەوەی 27 سەنتی نیشان دەدات.
ئەم شەپۆلە نوێیەی دابەزینی نرخەکان نیشانەی ئەوەیە کە بازاڕەکان هێشتا لە نێوان ترس و ئومێدی پێشهاتە سیاسییەکانی نێوان واشنتن و تاراندا دێن و دەچن. سەرەڕای ئەو گرژییە کاتییانەی کە جارجارە سەرهەڵدەدەنەوە، بەڵام وەبەرهێنەران هێشتا چاوەڕوانی ئاسۆیەکی ڕوونتر دەکەن بۆ دۆخی گەرووی هورمز و سەقامگیربوونی دابینکردنی وزە لەسەر ئاستی جیهاندا.