سوپای ئەمریکا ڕایگەیاند، بۆمبهاوێژێکی ستراتیژیی جۆری “B-52 Stratofortress” لە ویلایەتی کالیفۆرنیا تێکشکا و بەپێی زانیارییە سەرەتاییەکانیش، هەر هەشت سەرنشینەکەی ناو فڕۆکەکە گیانیان لەدەستداوە.
بنکەی ئاسمانیی “ئێدواردز” لە بەیاننامەیەکدا ئاشکرای کرد، فڕۆکەکە کاتژمێر ١١:٢٠ی بەیانی ڕۆژی دووشەممە (بە کاتی ناوخۆ)، کەمێک دوای فڕینی لە فڕۆکەخانەی بنکەکە، لە کاتی ئەنجامدانی “ئەرکێکی تاقیکاریی ڕۆتینی”دا تووشی ڕووداو بووە و تێکشکاوە. لە بەیاننامەکەدا هاتووە: “هەموو نیشانە سەرەتاییەکان باس لەوە دەکەن کە هیچ یەکێک لە سەرنشینەکان ڕزگاریان نەبووە.”
بەپێی ئەو دیمەنە ئاسمانیانەی لە میدیاکانەوە بڵاوکراونەتەوە، پاشماوەی فڕۆکەکە لە ناوچەیەکی فراواندا سووتاوە و تەنها پارچە تێکشکاوەکانی ماونەتەوە. پەیامنێرانیش ئاماژەیان بەوە کردووە کە دوای تێکشکانی فڕۆکەکە، دووکەڵێکی چڕی ڕەش ئاسمانی ناوچەکەی داپۆشیوە. تیمەکانی فریاگوزاری دەستبەجێ گەیشتوونەتە شوێنەکە و لێکۆڵینەوە لە هۆکاری کەوتنەخوارەوەی فڕۆکەکە دەستیپێکردووە.
فڕۆکەی “B-52” بۆمبهاوێژێکی مەودا دووری ستراتیژییە و یەکێکە لە کۆڵەکە سەرەکییەکانی هێزی ئاسمانیی ئەمریکا کە لە ساڵانی پەنجاکانی سەدەی ڕابردووەوە بەکاردەهێنرێت. ئەم فڕۆکەیە توانای هەڵگرتنی چەکی ئەتۆمی هەیە و مەودای فڕینەکەی دەگاتە نزیکەی ١٦ هەزار کیلۆمەتر. پێشتر لە ململانێ گەورەکانی وەک جەنگی ڤێتنام، جەنگی کەنداو، عێراق و ئەفغانستان بەشداری پێکراوە.
ئاژانسه‌كان