ئەمڕۆ دووشەممە، ٢٢ـی حوزەیرانی ٢٠٢٦، لەگەڵ کردنەوەی بازاڕەکانی جیهان لە یەکەم ڕۆژی مامەڵەکانی هەفتەدا، نرخی زێڕ و زیو لەسەر ئاستی جیهانی و بازاڕەکانی ناوخۆدا ڕوویان لە بەرزبوونەوە کردەوە و پاشەکشەکەی کۆتایی هەفتەی ڕابردوویان قەرەبوو کردەوە.
لە بازاڕە جیهانییەکاندا، نرخی یەک ئۆنسە زێڕ بەرزبووەوە بۆ 4,198.27 دۆلار، یەک کیلۆگرام بە 134,977.35 دۆلار و یەک گرامیش بە 134.98 دۆلار مامەڵەی پێوە دەکرێت.
هاوکات لە بازاڕەکانی ناوخۆشدا و بەپێی نوێترین نرخی فەرمی سەندیکای زێڕنگران، عەیارەکان بەهایەکی بەرزتریان تۆمارکرد؛ عەیارەی 22 بە 969,068 دینار، عەیارەی 21 بە 925,019 دینار و عەیارەی 18 بە 792,874 دینار مامەڵەی پێوە دەکرێت.
لەلایەکی دیکەوە، بازاڕی زیویش هاوشێوەی زێڕ ڕووی لە بەرزبوونەوە کرد، بە جۆرێک لە ئێستادا نرخی هەر ئۆنسەیەک زیو گەیشتووەتە 66.62 دۆلار، هەر کیلۆگرامێک بە 2,141.82 دۆلار مامەڵەی پێوە دەکرێت و نرخی هەر گرامێکیش لەسەر 2.14 دۆلار جێگیر بووە.
شارەزایانی دارایی ئاماژە بەوە دەکەن کە سەرەڕای ئەوەی نرخی نەوت دابەزیوە و پاڵپشتی بۆ نرخی زێڕ دروستکردووە، بەڵام پێشبینییەکان بۆ بەرزکردنەوەی ڕێژەی سوودی بانکی دوای ئاماژە توندەکانی بانکی ناوەندی ئەمریکا (Federal Reserve)، کاریگەرییان لەسەر داهاتووی نرخی زێڕ دروستکردووە
.
هاوکات لەسەر ئاستی سیاسی، خولی یەکەمی گفتوگۆکانی نێوان بەرپرسانی باڵای ئەمریکا و ئێران لە سویسرا ڕۆژی دووشەممە کۆتاییهات؛ میدیای ئێران دەڵێت، ئەمریکا و ئێران لەسەر نەخشەڕێگەیەک بۆ گەیشتن بە ڕێککەوتنی کۆتایی لە ماوەی 60 ڕۆژدا ڕێککەوتوون، کە ئەمەش چاوەڕوانی نوێی لە بازاڕەکاندا دروست کردووە.