کەمکردنەوەی رێژەی وەرگرتنی گەنمی هەرێمی کوردستان لەلایەن حکومەتی فیدراڵییەوە، مەترسی لەسەر کەرتی کشتوکاڵ دروستبووە و بەرپرسانیش هۆشداری دەدەن گەر دۆخەکە بەم شێوازەی ئێستا بەردەوام بێت، ژمارەیەکی زۆر لە جووتیاران ناچار دەبن بەتەواوی دەست لە کارووباری چاندن و کشتوکاڵکردن هەڵگرن.
نازم محەمەد، بەڕێوەبەری بازرگانیی دەغڵودان لە دهۆک، پەردەی لەسەر ئەم کێشەیە لادا و رایگەیاند، کە ئەمساڵ نزیکەی 85% گەنمی جووتیاران لەسەر زەوییەکان دەمێنێتەوە و وەرناگیرێت.
ناوبراو ئەم بڕیارەی حکومەتی عێراقی بە “غەدرێکی گەورە” لە دژی جووتیارانی دهۆک و تەواوی هەرێمی کوردستان وەسف کرد.
بەڕێوەبەری بازرگانیی دەغڵودان ئاماژەی بەوەش کرد کە ئەم رێژە کەمەی وەرگرتنی گەنم کاریگەرییەکی زۆر خراپ و نەرێنی لەسەر بژێوی و دەستکەوتی دارایی جووتیاران جێدەهێڵێت.