ئاگرێکی بەهێز لە پاشماوەی دەخڵودانی (پرێز) گوندی سێجێی سەر بە قەزای سێمێل کەوتەوە و بووە هۆی سووتانی ڕووبەرێکی بەربڵاو و بەشێک لە کەلوپەلی هاووڵاتییان.
کەریم سێجی، موختاری گوندەکە ڕایگەیاند کە پاشماوەی دەخڵەکە بۆ خۆراکی ئاژەڵ مابووەوە و خۆشبەختانە بەهۆی ئەوەی دوێنێ دروێنە کرابوو، زیانەکان کەمتر بوون، چونکە ئەگەر پێش دروێنە با، هەموو بەرهەمەکە دەسووتا.
تیمەکانی ئاگرکوژێنەوەی سێمێل، سەرەڕای سەختیی ڕێگاکە، بە خێرایی گەیشتنە شوێنەکە و توانیان ئاگرەکە کۆنترۆڵ بکەن و ڕێگری بکەن لەوەی بگاتە ناو گوندەکە.
جێی باسە، لە ئێستاشدا تیمەکان و خەڵکی ناوچەکە سەرقاڵی کۆنترۆڵکردنی ئاگرەکەن لە تەواوی شوێنەکە بۆ دڵنیابوونەوە لە نەمانی مەترسییەکە.