ئەمڕۆ دووشەممە 8/3، بە ئامادەبوونی مەسرور بارزانی، سەرۆکی حکومەتی هەرێمی کوردستان و میر و بابەشێخی ئێزیدیان و سەرۆکی کەنیسەی کلدانی لە عێراق و جیهان، ڕێوڕەسمێکی تایبەت بە دوازدەیەمین ساڵیادی جێنۆسایدی ئێزیدی و کۆمەڵکوژیی شنگال بەڕێوە چوو.

 لە گوتارێكدا كە لە ڕێوڕەسمەكەدا پێشكەشی كرد، سەرۆكی حكومەت ئاماژەی بە قوربانیدانی هێزی پێشمەرگەی كوردستان كرد  کە لە ژێر سەرکردایەتیی سەرۆک مەسعود بارزانی، ئەو ناوچانەیان لە دەست تیرۆریستانی داعش ڕزگار كرد.

سەرۆکی حکومەت هەروەها باسی لە هەوڵەكانی حكومەتی هەرێمی كوردستان كرد بۆ ڕزگاركردنی ڕفێندراوانی ئێزدی و ئەو پاڵپشتییانە كرد كە حكومەتی هەرێمی كوردستان پێشكەش بە ڕزگاربووانی ئێزدی و توێژە جیاوازەكانی ئەم پێكهاتەیەی كوردستانی دەكەن. هاوكات داوای لە حكومەتی فیدرالیی عێراق كرد، هاریكار بن لە جێبەجێكردنی ڕێككەوتنی شنگال، تاوەكوو كوردانی ئێزدی بە سەربڵندی بگەڕێنەوە سەر ماڵ و زێدی خۆیان.

 ئەمەش دەقی گوتارەكەیە:

 بە ناوی خوای مەزن و دلۆڤان

ئامادەبووانی هێژا و قەدرگران

هەمووتان بەخێر بێن، سەر سەر و سەر چاوان

سوپاسی ئامادەبوونی ئێوە هەمووتان دەكەم بۆ ئەم بۆنە گرنگە، سوپاسی ئامادەبوونی میرحازم تەحسین بەگ، جەنابی بابەشێخ، جەنابی پاتریارك، نوێنەری بەڕێز زەیدی، جەنابی دكتۆر فوئاد، كونسوڵ و هەموو ئامادەبووانی هێژا دەكەم بۆ ئەم بۆنەیە.
ئەمڕۆ ئێمە یادی 12 ساڵەی جینۆسایدی خوشك و برایانی خۆمانی ئێزدی دەكەین، كە لەسەر دەستی تیرۆریستانی داعش، مەزنترین تاوان دەرهەق بە خوشك و برایانی ئێمەی ئێزدی كران كە ناخی هەموو مرۆڤێكی نەك بە تەنیا لە كوردستان، بەڵكوو لە دەرەوەی كوردستان و هەموو جیهان هەژاند. بەڵام ئەو ڕۆژەی ئەو تاوانە كرا، جەنابی سەرۆك بارزانی بەڵێنی دا كە پێویستە ئێمە تۆڵەی ئەمە بكەینەوە و پێویستە ئێمە شنگال جارێكی دیكە لە دەست ئەو تیرۆریست و غەدارانە ئازاد بكەین. پاش سەد ڕۆژ لەو بەڵێنە، من لە خزمەت جەنابی سەرۆكدا بووم و ئێمە گەیشتینە سەری چیای شنگال، چیای شنگال و شنگال و هەموو دەڤەر ڕزگار كران لەدەست ئەو تاوانبارانە.

بە سەدان پێشمەرگە خوێنی خۆیان كردە قوربانی. من شاهێدی قوربانیدانی ئەو پێشمەرگانە بووم بۆ ئەوەی شەرەف و كەرامەتی خوشك و برایانی ئێمەی ئێزدی بپارێزرێ و تۆڵە لەو دوژمنە تیرۆریستانە بكرێتەوە. بە سەربڵندییەوە ئێمە لە خزمەتی جەنابی سەرۆك گەیشتینە شنگال و ئەم دەڤەرە بەشێوەیەكی گشتی ڕزگار كرا، بەڵام ئەم تاوانە لەبیر نەكرا. بە هەزاران خوشك و برای ئێمەی ئێزدی بوونە قوربانیی ئەم جینۆسایدە، گەلێك ڕفێنران و گەلێكیش كۆمەڵكوژ كران. لەو ڕۆژەوە تا ئەمڕۆ كابینە یەك لە دوای یەكەكانی حكومەت بەردەوام بوون بۆ ئەوەی بگەڕێن بۆ دیتنەوەی ئەو قوربانییانە و تا ئێستا زیاتر لە 3500 خوشكی ئێمە دیتراونەتەوە و ڕزگار كراون لە دەست ئەو تاوانبارانە، بەڵام زیاتر لە 2700 كەسی دیكەش هێشتا ماون و نەدۆزراونەتەوە. هیوای ئێمە ئەوەیە هەر كەسێك بیەوێت هاوكاریی ئێمە بكات، پێكڕا ئێمە بتوانێت ئەو كەسانە بدۆزینەوە و ڕزگار بكەین.

جێی خۆیەتی سوپاسی هاوپەیمانان بكەم بۆ ئەو هاریكاری و پشتیوانییەی ئەوان كردیان لە تێكشكاندنی تیرۆریستانی داعش و هاریكاریكردنی ئێمە بۆ ئەوەی ئێمە زیاتر خزمەتی خوشك و برایانی خۆمانی ئێزدی بكەین، ئەوانەی ئاوارە كران و جێی خۆیان بەجێ هێشت و هاتنە كوردستان و گەلێكیشیان ڕوویان كردە دەرەوەی هەرێمی كوردستان و گەیشتنە وڵاتانی دەرەوە و ئەورووپا.

هەموویان دەرگەی خۆیان بۆ ئەو خوشك و برایانە كردەوە، بەڵام هیچ جێیەك نابێتە ماڵی مرۆڤ و چ جێ نابنە واری مرۆڤ، بەڵام لە جێی خۆیەتی كە سوپاسی هەموو ئەو دەوڵەتانە بكەم كە هاریكاریی ئێمەیان كرد، هەموو ڕێكخراوە ناحكومییەكان بكەم كە هاریكاریی ئێمەیان كرد، بە تایبەتیش سوپاسی خەڵكی كوردستان بكەم كە هەموویان دەرگەی خۆیان بۆ ئەو خوشك و برایانە كردەوە.

بە داخەوە هێشتا زیاتر لە 20 هەزار ماڵی ئاوارەی ئێزدی لە كەمپاندا دەژین، هەر چەندە مرۆڤ لە وڵاتی خۆیدا ئاوارە نییە، بەڵام كاتێك مرۆڤ لەسەر ماڵ و حاڵی خۆی هەستا، بێگومان ژیانی مرۆڤ بە زەحمەتتر دەكەوێت. هیوای ئێمە ئەوەیە كە ئێمە ڕۆژێك بتوانین ئەوانە بە سەربڵندی بگەڕێنینەوە بۆ جێی خۆیان بۆ شنگال و بۆ هەموو ئەو گوند و دەڤەرانەی كە ناچار بوون كۆچی لێ بكەن.

سوپاسی دەسەڵاتی حكومەتی عێراقیش دەكەین بۆ هاریكاریكردنیان لە دۆزینەوەی گۆڕە بەكۆمەڵەكان، بۆ هاریكاریكردنیان لەگەڵ حكومەتی هەرێمی كوردستان بۆ گواستنەوەی ڕوفاتی ئەوانە بۆ زێدی خۆیان. بەڵام ئێمە هێشتا داواكاریمان هەیە. داواكاریمان ئەوەیە كە حكومەتی فیدرالی هاریكار بێت بۆ ئەوەی شنگال جارێكی دیكە دۆخەكەی ئاسایی ببێتەوە، خەڵكی شنگال بە سەربڵندی بگەڕێنەوە بۆ جێی خۆیان، ئەمنیەت و ئاسایش و بەڕێوەبردنی ئیدارەی شنگالیش بۆ خەڵكی شگال بگەڕێتەوە. ئێمە ئەو داخوازییەمان لە حكومەتی فیدرالی هەیە و حكومەتی هەرێم بەردەوام دەبێت بۆ ئەوەی جارێكی دیكە هەم شنگال و هەم دەوروبەری شنگال ئاوەدان بكرێن.

ئێمە زۆر هەوڵمان دا لە كاتی خۆیدا لەگەڵ نەتەوە یەكگرتووەكان، بە تایبەتیش لەگەڵ (یونیتاد) كە دادگایەكی تاوان لە دژی داعش دروست بكرێت بۆ دادگاییكردنی ئەو كەسانەی كە ئەم تاوانانەیان لە دژی خوشك و برایانی ئێمەی ئێزدی ئەنجام دا، بەڵام بەداخەوە حكومەتی پێشوو هاریكار نەبوو. هیوای ئێمە ئەوەیە كە ڕۆژێك ئەم دادگایە دابمەزرێت و هەر كەسێك دەستی لەم تاوانە هەبێت، بە سزای خۆی بگات.

داوای ئێمە لە كۆمەڵگەی نێودەوڵەتی ئەوەیە كە هاوكار بن هێندەی مومكین بێت بۆ كەمكردنەوەی ئێش و ئازاری قوربانییانی دەستی تیرۆر بە تایبەت خوشك و برایانی ئێمەی ئێزدی. ئەوەی لە دەست ئێمە هات، كردمان و بەردەوامیش بووین. بە تایبەتی ئەو خوشك و برایانەی ڕزگار كراون، ئەو خوشكانەی دۆزراونەتەوە و ڕزگار كراون، ئێمە بە ناوی حكومەتی هەرێم دەرماڵەیەكمان بۆ تەرخان كردوون تاوەكوو بەشێك لە ئێش و ئازاری ئەوان كەم بكرێتەوە، هەرچەندە ئەوە هیچ نییە دەرهەق بەو هەموو خەسارەت و غەدر و زوڵمەی كە بەرانبەر ئەوان كراون، بەڵام ئەوەندەی لە دەستمان بێت، ئێمە ئامادەین و بەردەوامیش دەبین.

ئەو قوتابییانەی لە زانكۆكان ویستوویانە بەردەوام بن لە خوێندن، ئێمە زەمالەی خوێندنمان بۆ دەستنیشان كردوون و پێمان داون، زۆر لەوان لە زانكۆكان دەرچوون و ئێستا جێی ئەوانیش دیارە.

جارێكی دیكە دەڵێم پێویستە ئێمە پێكڕا كارێكی وا بكەین كە ئەم تاوانانە دووبارە نەبنەوە، نە بەرانبەر خوشك و برایانی ئێمەی ئێزدی، نە دەرهەق بە خوشك و برایانی ئێمەی كریستییان، نە دەرهەق خوشك و برایانی ئێمەی موسوڵمان، تیرۆر نە دین دەناسێت و نە نەتەوە دەناسێت، تیرۆر دژ بە مرۆڤایەتییە. لەبەر ئەوە هاریكاری و پشتیوانیی هەمووان پێویستە و ئێمە پێكڕا كار بكەین بۆ ئەوەی جارێكی تر تیرۆر لە عێراق سەرهەڵنەداتەوە و یەكێك لەو ڕێگایانەی كە وا دەكات ڕێگریی لە سەرهەڵدانی تیرۆر بكات، ئەوەیە كە دادپەروەری هەبێت، یەكسانی هەبێت، ڕێز لە مافی هەموو ئایین و نەتەوەیەك بگیرێت. ئێمە وەك حكومەتی هەرێم بەردەوام دەبین لەگەڵ هەموو دۆستانی خۆمان كار بكەین، بە تایبەتی لەسەر ئاستی حكومەتی فیدرالیش تاوەكوو جارێكی تر توندوتیژی نەگەڕێتەوە ئەم وڵاتە. میللەتی ئێمە ماندوو بووە، ئێمە پێویستیمان بە پشوودان هەیە، پێویستیمان بە پێشوەچوونە، پێویستیمان بەوەیە كە منداڵەكانی ئێمە دڵنیا بن لەوەی داهاتوویەكی گەشتر چاوەڕێی ئەوانە. ترسی كوشتن و گرتن و ڕفاندن نابێت چیتر لە وڵاتی ئێمە بمێنێت. داوا لە هەموو دۆستانی خۆمان دەكەین، دەستی خۆیان بدەنە دەستمان بۆ ئەوەی هاریكار بین و كۆتاییی بەم مەترسییە بهێنین و كۆتاییی بەم تاوانانە بهێنین.

جارێكی دیكە داوا لە حكومەتی فیدرالی دەكەم، هاریكار بن بۆ جێبەجێكردنی ڕێككەوتنی شنگال، تاوەكوو هەم خەڵكی ئێمە بە سەربڵندی بگەڕێتەوە باژێڕ و گوندەكانی خۆیان، هەم خەڵكی ئێمە بە سەربڵندی بگەڕێتەوە شار و گوندەكانی خۆیان، هەم ژیانی ئەوان تەئمین بكرێت و قەرەبووی ئەو هەموو تاوان و ناهەقییە بكرێتەوە كە دەرهەق بەو خەڵكە كران.

سوپاسی ئامادەبوونی ئێوە دەكەم. بیرهێنانەوەی ئەم تاوانە و ئەم جینۆسایدە، نابێت تەنیا ڕێوڕەسمێک بێت بۆ ڕۆژێك، بەڵكوو پێویستە ئەمە سۆزێك بێت بۆ ئەوەی ئێمە هەموو پێكڕا خەبات بكەین و تێبكۆشین، پێكڕا كار بكەین تا كۆتاییی بەو نەهامەتییانە بهێنین و ژیانێكی سەربەرز بۆ هەموو خوشك و برایانی ئێمەی ئێزدی و هەموو خەڵكی كوردستان و عێراق بگەڕێنینەوە.

 هەر سەربڵند و سەرفراز بن، كوردستانمان هەر ئاوەدان بێت.