بۆ یەکلاکردنەوەی چارەنووسی پشکی هەرێمی کوردستان لە بودجەی فیدراڵی بۆ ساڵی ٢٠٢٧ و بڕینەوەی کۆتایی ناکۆکییەکان، شاندێکی باڵای حکوومەتی هەرێمی کوردستان لە بەغدایە و ئەمڕۆ شەممە لەگەڵ وەزارەتی دارایی عێراق کۆدەبێتەوە؛ ئەمەش لە کاتێکدایە کە کەمکردنەوەی رێژەی پشکی هەرێم ناڕەزایەتییەکی توندی لێکەوتووەتەوە و فراکسیۆنە کوردییەکانیش هەڕەشەی ڕەتکردنەوەی دەکەن.
بەپێی زانیارییەکانی ئاژانسی “زاگرۆس”، شاندە دانوستانکارەکەی حکوومەتی هەرێم کە شەوی ڕابردوو گەیشتوونەتە پایتەخت، بڕیارە کاتژمێر ١٠:٠٠ی سەرلەبەیانی ئەمڕۆ لە بارەگای وەزارەتی دارایی فیدراڵ، لەگەڵ فالح ساری، وەزیری دارایی عێراق و تیمی تەکنیکیی وەزارەتەکە کۆببنەوە. چاودێران پێشبینی دەکەن ئەمە دوایین وێستگەی گفتوگۆکان بێت سەبارەت بە دەستکاریکردنی رەشنووسی بودجە، پێش ئەوەی پڕۆژەکە یەکجاری ئاراستەی ئەنجوومەنی وەزیران و پەرلەمان بکرێت.
گرفتە سەرەکییەکەی بەردەم دانوستانەکان بۆ ئەوە دەگەڕێتەوە کە لە رەشنووسی نوێی بودجەدا، پشکی هەرێمی کوردستان لە (14.67%)ـەوە بۆ (12.67%) دابەزێنراوە و تەنانەت لە چەند ماددە و بڕگەیەکی تریشدا رێژەکە لەوەش کەمتر کراوەتەوە. هەر ئەمەش وازی لە شەپۆلێکی ناڕەزایەتی هێناوە و فراکسیۆنە کوردییەکان پێشوەختە هەڵوێستی خۆیان یەکخستووە و رایانگەیاندووە، کە بە هیچ شێوازێک دەنگ بەم رەشنووسە نادەن، چونکە بە “ستەمکارانە” و پێشێلکاریی ئاشکرا بۆ مافەکانی خەڵکی کوردستان ناوی دەبەن.
سەبارەت بە خشتەی کاتیش، سەرەڕای ئەوەی بڕیار بوو لە ١٥ی تشرینی یەکەم پڕۆژەیاساکە لە ئەنجوومەنی ئابوورییەوە ڕەوانەی ئەنجوومەنی وەزیران بکرێت، بەڵام پرۆسەکە دواکەوتووە. بڕیارە لەم هەفتەیەدا کۆتایی بەو دواکەوتنە بهێنرێت و پڕۆژەکە بخرێتە بەردەم ئەنجوومەنی وەزیران تاوەکو لە کۆبوونەوەی ئاسایی هەفتەی داهاتوودا دەنگی لەسەر بدرێت. سەرنجامی کۆبوونەوەی ئەمڕۆی هەولێر و بەغدا یەککلاییکەرەوە دەبێت؛ ئەگەر لێکتێگەیشتن لە بەرژەوەندی هەرێم بکرێت، ڕەشنووسەکە تێدەپەڕێت، بەڵام ئەگەر بارودۆخەکە بەم شێوازەی ئێستا بمێنێتەوە، پێشبینی دروستبوونی قەیرانێکی نوێی سیاسی و دارایی دەکرێت.