یوسف چاوشین، بەڕێوەبەری گشتی چاودێری و گەشەپێدانی کۆمەڵایەتی هەولێر رایگەیاند: شاندێکی هەرێمی کوردستان بۆ دوو مەبەست سەردانی بەغدا دەكات ئەوانیش هاوتاكردنی مووچەی خاوەنپێداویستییە تایبەتەكان و ئەوی دیکەش دەستكردنەوەیە بە ناونووسینیان.
ئاماژەی بەوەشدا، ” پێش جەژنی قوربان کۆبوونەوەیەکمان کرد و باس لە چەند خاڵێكی گرنگ كرا، لەوانە پێویستە دەست بە ناونووسینەوەی خاوەنپێداویستییە تایبەتەكان بكرێتەوە و مووچەكانیشیان لەگەڵ بەغدا هاوتا بكرێت، بۆ ئەو مەبەستەش شاندێكی هەرێمی كوردستان سەردانی بەغدا دەكات”.
شیاوی باسە مووچەی خاوەنپێداویستییە تایبەتەكان لە بەغدا لە 250 هەزارەوە دەستپێدەكات و تا نزیكەی 500 هەزار دینارە، بە هاوتاكردنی، خاوەنپێداویستییە تایبەتەكانی هەرێمی كوردستان سوودمەند دەبن.