وه‌زیری شه‌هیدان و ئه‌نفالكراوانی هه‌رێمی كوردستان، ڕایده‌گه‌یه‌نێ، بۆ گواستنەوەی مووچەی زیندانیانی سیاسی بۆ سەر حكوومەتی عێراق، چاوه‌ڕوانی دیاریكردنی كاتێكن بۆ سه‌ردانی به‌غدا و گفتوگۆكردن له‌سه‌ر ئه‌و پرسه.
عەبدوڵڵا حاجی مەحموود، وەزیری كاروباری شەهیدان و ئەنفالكراوانی حكوومەتی هەرێمی كوردستان ڕایگەیاند: هەماهەنگی و گفتوگۆ كراوە لەگەڵ حكوومەتی هەرێمی كوردستان و وەزارەتی كاروباری شەهیدان و ئەنفالكراوان بۆ ئەوەی لە ڕێگەی لیژنەیەكەوە كە لە وەزارەتی كاروباری شەهیدان و ئەنفالكراوان پێكهێنراوە لەگەڵ لیژنەیەكی باڵا لە حكوومەتی هەرێمی كوردستان سەردانی بەغدا بكەین و لەگەڵ دامەزراوەی زیندانییە سیاسییەكانی عێراق گفتوگۆ بكرێت بەمەبەستی گرتنەبەری ڕێكاری پێویست بۆ گواستنەوەی مووچەی زیندانیانی سیاسی هەرێم بۆ سەر بەغدا.
ئاماژه‌ی به‌وه‌ش كردووه: لەگەڵ نوێنەرایەتیی حكوومەتی هەرێمی كوردستان لە بەغدا لەسەر هێڵین بۆ ئەوەی كاتی سەردانی شاندەكە بۆ بەغدا دیاری بكرێت.
بەپێی ئاماری بەڕێوەبەرایەتیی زیندانییە سیاسییەكانی سەر بە وەزارەتی كاروباری شەهیدان و ئەنفالكراوان، زیاتر لە 21 هەزار زیندانی سیاسی لە هەرێمی كوردستان هەیە.