پەیامی پیرۆزبایی مەکتەبی سیاسیی پارتی دیموکراتی کوردستان بەبۆنەی (٥٤)یەمین ساڵیادی دامەزراندنی یەکێتیی زانایانی ئایینی ئیسلامی کوردستان
بەڕێزان سەرۆک و ئەندامانی مەکتەبی تەنفیزی یەکێتیی زانایانی ئایینی ئیسلامی کوردستان،
ئەمڕۆ (٥٤)ساڵ بەسەر دامەزراندنی یەکێتیی زانایانی ئایینی ئیسلامی کوردستان تێپەڕدەبێت. ئەو ڕێکخراوە گرنگ و کاریگەرەی بە بڕیار و ڕێنمایی (بارزانیی نەمر) دامەزرا. دامەزراندنی ئەو یەکێتیە دەستکەوتێکی تری بزووتنەوەی ڕزگاریخوازی گەلەکەمان بوو بۆ توێژی مامۆستایانی ئایینی بە تایبەتی و کۆمەڵگەی کوردی بە گشتی.
یەکێتیی زانایانی ئایینی ئیسلامی کوردستان لە ماوەی تەمەنی پڕ بەخششی ڕۆڵێکی کاریگەری هەبووە لە قۆناخە جیاجیاکانی تێکۆشانی نیشتمانی و نەتەوەییماندا. لە لایەکی دیکەوە ڕۆڵی بەرچاوی هەبووە لە پەروەردە و پێگەیاندنی کەسایەتی تێکۆشەر و دڵسۆز و سەرکردە.
یەکێتیی زانایانی ئایینی ئیسلامی کوردستان لە کاروانی تەمەنی خۆیدا بە پەیامی ڕاست و دروستی خۆی توانیویەتی بێ سرەوتن برەو بە هزر و هەستی نەتەوەیی و نیشتمانی و گەشەپێدانی هۆشیاریی بدات و جەخت لەسەر بنەما ڕەسەنەکانی کولتووری، نەتەوەیی و پێکڤەژیان و لێبوردەیی بکات، لەم ڕێگەیشدا قوربانی زۆری بەخشیوە، بۆیە هەمیشە جێگەی شانازی گەلەکەمانن.
ئەمڕۆیش لەم هەلومەرجە هەستیارەی هەرێمی کوردستان و ئەو بارودۆخەی لە ئارادایە بە تایبەتی هەڵبژاردنی خولی شەشەمی پەرلەمانی کوردستان لە (٢٠/١٠/٢٠٢٤)، پێویستە بە هەموو لایەک و هەموو چین و توێژەکانی کۆمەڵگەکەمان لەسەر ئاستی سیاسی و مەدەنی بەرپرسانە و دڵسۆزانە هەوڵ بۆ پاراستنی شەرعیەتی ئەو ئەزموونە و سەقامگیریی و ئارامی و دەستکەوتەکانی بدەن.
لەم بۆنەیەدا پیرۆزبایی گەرمی خۆمان
ئاراستەی ئێوە و ئەندامانی ئەنجوومەنی ناوەندیی یەکێتییەکەتان و سەرجەم مامۆستایانی ئایینی پیرۆزی ئیسلام دەکەین و خەبات و تێكۆشانتان بەرز دەنرخێنین. ھاوکات بە بایەخەوە لە ڕۆڵی گرنگ و هەستیاری بەڕێزتان دەڕوانین و هیوادارین وەك هەمیشە دڵسۆزانە و بەرپرسانە پتر برەو بە كارنامە و چالاكییەكانتان بدەن.
مەکتەبی سیاسیی پارتی دیموکراتی کوردستان
٢١ی ئەیلوولی٢٠٢٤