سەرۆک بارزانی لە 54ـەمین ساڵیادی ڕێككه‌وتننامه‌ى (11)ى ئادار جەخت لە “پەیامی ئاشتیخوازانە و پێكەوەژیانی گەلی كوردستان” دەکاتەوە و دووپاتیشی دەكاتەوە، “گەلی كوردستان لە ڕێگەی چەسپاندنی دۆزە ڕەواكەیدا لە خەبات و تێكۆشانی خۆی بەردەوام دەبێت”.
ئەمڕۆ دووشەممە، 11-03-2024، سەرۆک بارزانی لە 54ـەمین ساڵیادی ڕێككه‌وتننامه‌ى (11)ى ئاداری 1970 پەیامێکی بڵاوکردەوە و دەڵێت، ڕێككەوتننامەکە “بەرهەمی شۆڕشی ئەیلول بە ڕابەرایەتیی بارزانیی نەمر و خەبات و قوربانیدانی پێشمەرگە و سەرجەم چینوتوێژەکانی كوردستان بوو لە بەرانبەر ستەم و زۆرداریی دەستەڵاتدارانی عێراق”.
دەقی پەیامی سەرۆك بارزانی لە 54ـەمین ساڵیادی ڕێككەوتننامەی 11ـی ئادار:
بەناوی خودای بەخشندە و میهرەبان
ڕێككەوتننامەی 11ـی ئادار بەرهەمی شۆڕشی ئەیلول بە ڕابەرایەتیی بارزانیی نەمر و خەبات و قوربانیدانی پێشمەرگە و سەرجەم چینوتوێژەکانی كوردستان بوو لە بەرانبەر ستەم و زۆرداریی دەستەڵاتدارانی عێراق. بەرهەمی ئەو خەباتە تۆكمەیە بوو كە لەپێناو گەڕاندنەوەی ماف و مسۆگەركردنی دیموكراسی و شەراكەت و پێكەوەژیان دەستی پێكرد و حكومەتی ئەوكاتی عێراقی ناچار كرد دان بە بەشێك لە مافەكانی گەلەكەماندا بنێت.
لە پەنجا و چوارەمین ساڵیادی ڕێككەوتننامەی یازدەی ئاداردا جەخت لە پەیامی ئاشتیخوازانە و پێكەوەژیانی گەلی كوردستان دەكەینەوە و ئەوەش دووپات دەكەینەوە كە گەلی كوردستان بۆ گەیشتن بە مافەكانی قوربانییەكی بێهەژماری داوە و لەڕێگەی چەسپاندنی دۆزە ڕەواكەیدا لە خەبات و تێكۆشانی خۆی بەردەوام دەبێت.
مەسعود بارزانی
11ی ئاداری 2024