بەڕێزان/ سکرتێر و ئەندامانی مەکتەبی سکرتاریەت و ئەنجوومەنی باڵای یەکێتیی ئافرەتانی کوردستان..
ئەمڕۆ (۷۳) ساڵ بەسەر دامەزراندنی یەکێتیی ئافرەتانی کوردستان تێدەپەڕێت، ئەو ڕێکخراوەی بە بڕیار و ڕێنمایی (بارزانیی نەمر) لە (١١/ ١٢/ ١٩٥٢) دامەزرا، دامەزراندنی ئەو ڕێکخراوە سڤیل و گرنگە وەچەرخانێکی دیار و کاریگەر بوو لە بزووتنەوەی ڕزگاریخوازییمان و خەباتی بەردەوامی گەلەکەمان بە گشتی و توێژی ئافرەتان بە تایبەتی.
یەکێتیی ئافرەتانی کوردستان، وەک بزووتنەوەیەکی دیرۆکی و بە ئەزموون دەستکەوتێکی دیکەی گەلەکەمانە، کە بە درێژایی تەمەنی کارکردنی ڕۆڵ و سەنگێکی تایبەتی هەبووە لە قۆناخە جیاجیاکانی تێکۆشانی نیشتمانی و نەتەوەییماندا.
لەلایەکی دیکەوە ئەو ڕێکخراوە قوتابخانەیەکی پێگەیاندنی ئافرەتانی لە خۆبردوو و تێکۆشەر و دڵسۆز و سەرکردە بووە، بەمەش خزمەتێکی بێ پایانی خەباتی مەدەنیانە و پەروەردەیی و ڕۆشنبیریی لە کوردستاندا کردووە.
یەکێتیی ئافرەتانی کوردستان لەو کاروانەی هەوڵ و کۆششی بێوچانیدا هەمیشە ڕێکخراوێکی پێشەنگ و بوێر بووە بۆ خستنەڕووی خواست و ویستی ئافرەتان و دەستەبەرکردنی یەکسانیی و دادپەروەریی کۆمەڵایەتی و پێشکەوتنی کۆمەڵایەتی و گەشەپێدانی هۆشیاریی و هزری نەتەوەیی و نیشتمانیی، لەو ڕێگایەشدا قوربانی زۆری بەخشیوە و هەمیشە مایەی شانازی و سەرفرازی گەلەکەمان بووە.
یەکێتیی ئافرەتان بە پێی ئەرک و پلان و پرەنسیپ و پەیامی ڕاست و دروستی خۆی و هاوکات بە ڕەچاوکردنی بارودۆخ و هەلومەرجەکان، توانیویەتی برەو بەو ڕێکخراوە بدات و بە شانازییەوە دەستکەوتی مەزن لە هەموو بوارەکاندا بۆ سەرجەم ئافرەتان دەستەبەر بکات، هەروەها لە هەموو کایەکانی ژیان و جومگە گرنگ و دامەزراوەکانی ههرێمی كوردستان و ناوەندەکانی بڕیارداندا ڕۆڵی شیاوی خۆی ببینێ بۆ داکۆکیکردن لەم ئەزموونە حوکمڕانییە و پرۆسەی بونیاتنان و ئاوەدانکردنەوەدا.
ئەمڕۆ هەلومەرجی هەرێمی كوردستان و ئەو بارودۆخەی لە ئارادایە وا دەخوازێ بە هەموو لایەک و هەموو چین و توێژەکانی کۆمەڵگەکەمان لەسەر ئاستی سیاسی و مەدەنی و کۆمەڵایەتییەوە، بەرپرسانە و دڵسۆزانە هەوڵ بۆ پاراستنی سەقامگیریی و ئارامی و دەسکەوتەکان بدەین.
لە یادکردنەوەی ئەم بۆنە گرنگەدا وێڕای پیرۆزبایی گەرممان لە ئێوەی تێکۆشەر و ئەندامان و تێکڕای ئافرەتانی کوردستان، پاڵپشتی بەردەوامی پارتیمان بۆ یەکێتیی ئافرەتانی کوردستان دووپات دەکەینەوە، ئومێدەوارین دڵسۆزانە و بەرپرسانە هەوڵی پێشخستنی زیاتری ڕێکخراوە سەنگینەکەتان بدەن و کار و چالاکییەکانتان لە ئاست گۆڕانکارییەکان و پێداویستییەکانی قۆناخەکە و خواست و ویستی سەرجەم ئافرەتانی کوردستاندا بن.
هیوادارین بۆ هەمیشە لە ئاست ئەو کار و ئەرک و پەیامە پیرۆزەتان بن بۆ داکۆکیکردن لە مافە ڕەواکانتان.
بەرز و پیرۆز بێت ساڵیادی دامەزراندنی یەکێتیی ئافرەتانی کوردستان.
سڵاو و دروود بۆ گیانی پاک و بێگەردی شەهیدانی ئەو کاروانە شکۆدارەی یەکێتیی ئافرەتانی کوردستان و سەرجەم شەهیدانی کوردستان.
مەکتەبی سیاسیی پارتی دیموکراتی کوردستان
۱۰ کانوونی یەکەمـی ۲۰۲٥