وەزارەتی خوێندنی باڵا بڕیار دەدات بە لێخۆشبوون لە کرێی خوێندن بۆ قوتابیانی ناوچە کوردستانییەکانی دەرەوەی هەرێم، خاوەن پێداویستییە تایبەتەکان و سێ یەکەمە دانەمەزراوەکان لە کاتی درێژکردنەوەی ماوەی خوێندنەکەیاندا.
وەزارەتى خوێندنى باڵا و توێژینەوەى زانستیی حکوومەتی هەرێمی کوردستان بڕیارێکی نوێی لە بەرژەوەندیی بەشێک لە قوتابیانی خوێندنی باڵا (ماستەر و دکتۆرا) دەرکرد کە لە ساڵی خوێندنی (2023-2024) وەرگیراون.
بەگوێرەی بڕیارەکە، سێ توێژی دیاریکراو لە کاتی درێژکردنەوەی ماوەی خوێندنەکەیاندا، لە کرێی خوێندن دەبەخشرێن. توێژەکان بریتین لە:
1. قوتابیانی ناوچە کوردستانییەکانی دەرەوەی ئیدارەی هەرێم.
2. قوتابیانی خاوەن پێداویستیی تایبەت.
3. سێ یەکەمە دانەمەزراوەکان.
ئەم بڕیارە وەک ئاسانکارییەکە بۆ ئەو قوتابیانەی کە دەکەونە چوارچێوەی ئەو سێ توێژە و لە قۆناغەکانی ماستەر و دکتۆرادا درێژە بە خوێندن دەدەن.