مەسرور بارزانی پێشوازی لە کونسوڵی گشتیی کۆریای باشوور دەکات

سەرۆکی حکومەتی هەرێمی کوردستان، پێشوازی لە کونسوڵی گشتیی کۆریای باشوور دەکات و ڕایدەگەیەنێت، هەرێمی کوردستان بە پێزانینەوە دەڕوانێتە پشتیوانی و هاوکارییەکانی حکومەت و گەلی کۆریا.

ئەمڕۆ دووشەممە ٥ـی ئایاری ٢٠٢٦، مەسرور بارزانی، سەرۆکی حکومەتی هەرێمی کوردستان، پێشوازی لە سینگچۆل لیم، کونسوڵی گشتیی کۆماری کۆریا لە هەرێمی کوردستان کرد، کە بە مەبەستی ماڵئاوایی و بەبۆنەی کۆتاییهاتنی ئەرکەکەی سەردانی سەرۆکی حکومەتی کردبوو.

لە دیدارێکدا، سەرۆکی حکومەت سوپاسی کونسوڵی گشتیی کۆریای باشووری کرد بۆ ئەو ماوەیەی لە هەرێمی کوردستان کاریکرد، کە ڕۆڵێکی کاریگەری هەبوو لە بەهێزترکردنی پەیوەندییە دۆستانەکانی نێوان هەولێر و سێول. هاوکات مەسرور بارزانی سوپاس و پێزانینی هەرێمی کوردستانی بۆ پشتیوانی و هاوکارییە بەردەوامەکانی حکومەت و گەلی کۆریا دووپاتکردەوە.

لای خۆیەوە، سینگچۆل لیم کونسوڵی گشتیی کۆریا، ستایشی کاروانی پێشکەوتن، ئاوەدانی و ئەو چاکسازییانەی کرد کە کابینەی نۆیەمی حکومەتی هەرێمی کوردستان لە بوارە جیاجیاکاندا ئەنجامی داون.

کونسوڵی گشتیی کۆریا لە کۆتایی دیدارەکەدا ئاماژەی بەوە کرد، کە بە یادگاریی پڕ بایەخەوە هەرێمی کوردستان بەجێدەهێڵێت و ڕایگەیاند: “کوردستان هەمیشە لە دڵمدا دەبێت.”