لە قەزای شێخان، دیاردەی زۆربوونی سەگی بەرەڵا لەناو کۆڵان و گەڕەکەکاندا هۆشداری و نیگەرانی لای هاووڵاتیان دروست کردووە.
بەپێی گرتەیەکی ڤیدیۆیی کە بڵاوکراوەتەوە، زیاتر لە 30 سەگی بەرەڵا پێکەوە لە یەکێک لە کۆڵانەکانی قەزاکەدا دەبینرێن.
هاووڵاتیانی ناوچەکە دەڵێن، ئەم سەگانە بە کۆمەڵ دەسووڕێنەوە و بوونەتە مەترسیی بۆ سەر ژیانی خۆیان و بەتایبەتی منداڵان و کەسانی بەتەمەن، بە جۆرێک کە هاتوچۆی ڕۆژانەیانی سنووردار کردووە.
لەم چوارچێوەیەدا، دانیشتووانی قەزاکە داوا دەکەن، کە ئەو سەگە بەرەڵایانە کۆبکرێنەوە و ببرێنە شوێنی تایبەت بە خۆیان، بۆ ئەوەی مەترسی لەسەر سەر و ماڵی هاووڵاتیان نەمێنێت.