ڕۆژنامەی مارکای ئیسپانی بڵاویکردەوە کە یانەی ڕیاڵ مەدرید بە هیچ شێوەیەک نیازی ئەنجامدانی گرێبەستی نوێی نییە و دەرگای بازاڕی گواستنەوەی یاریزانانی داخستووە، مەگەر بارودۆخێکی نەخوازراو ڕووبدات یان یەکێک لە یاریزانەکانی ئێستای یانەکە بڕوات.
بەگوێرەی هەواڵەکە، کارگێڕی یانە شاهانەکە بە سەرکردایەتی فلۆرینتینۆ پێرێز پێیانوایە دەرگای گواستنەوە بە ڕێژەی لەسەدا نەوەدوپێنج داخراوە، ئەوەش دوای ئەوەی ڕاهێنەری نوێ دەستنیشانکرا و چەند گرێبەستێکی پێویست ئەنجامدران.
سەبارەت بەو لەسەدا پێنجەی کە ماوە، تەنها بۆ حاڵەتی لەناکاوی وەک ڕۆیشتنی یاریزانێک یان گۆڕینی پلان لەلایەن ڕاهێنەرەوە هێڵراوەتەوە.
لە کۆتاییشدا ڕۆژنامەکە دوپاتیکردووەتەوە کە خوسێ مۆرینیۆی ڕاهێنەر بە تەواوی لەم بازاڕی گواستنەوەیە ڕازییە و دڵنیایی داوە کە پێکهاتەکەی زۆر بەهێزە و توانای ئەنجامدانی کاری گەورەی هەیە لەم وەرزەدا.