لەڕێوڕەسمێکی گەورەدا یانەی ڕیاڵ مەدرید چابی ئاڵۆنسۆی بە وەکو ڕاهێنەری تازەی تیپەکەی بە میدیاکان ناساند و لێرە بەدوا ئەو ڕاهێنەرە سەرپەرشتی ڕاهێنانەکانی ڕیاڵ مەدرید دەکات و یەکەمین پاڵەوانەتیشی لەگەڵ یانەکە جامی جیهانی یانەکان دەبێت،کە بڕیار وایە مانگی داهاتوو دەست پێبکات
بۆندەکەی ئاڵۆنسۆ لەگەڵ ڕیاڵ مەدرید بۆ ماوەی دوو وەرز دەبێت.
ئاڵۆنسۆ پێشتر وەکو یاریزان یاری بۆ ڕیاڵ مەدرید کردوە لەنێوانی ساڵانی 2009 تاکو 2014 و چەندان نازناو و دەستکەوتی بەدەست هێناوە، وەکو ڕاهێنەریش لە ئەکادیمیای ئەو یانەیە سەرپەرشتیاری لاوانی تیپەکە بووە پاشان ڕووی کردە یانەی بایرن لیڤەرکوزنی ئەڵمانی.
ئاڵۆنسۆ لەدوای زیدان دەبێتە یەکێکی تر لەو ڕاهێنەرانەی،کە وەکو یاریزان و ڕاهێنەر کاری لەگەڵ ڕیاڵ مەدرید کردوە و چاوەڕوان دەکرێت لەماوەی داهاتوودا ئاستی لێهاتووی ئاڵۆنسۆ لەگەڵ مێرێنگی دەربکەوێت وەکو ڕاهێنەری تیپەکە.
“سەرکار ڕێبوار”