چێڵسی گفتوگۆکانی لەگەڵ یانەی ئەیاکس دەستپێکردووە بۆ گواستنەوەی بەرگریکارەکەی، یۆرێل ھاتۆ، لە ماوەی گواستنەوەی ھاوینەی ئێستادا، بۆ پشتگیریکردنی ھێڵی بەرگری یانە شینەکە پێش دەستپێکردنی وەرزی نوێ.
بەگوێرەی تۆڕی “تۆک سپۆرت”، بەرگریکارە ھۆڵەندییە ١٩ ساڵانەکە لە ئێستادا لە پێشینەی کارەکانی چێڵسییە، ھەروەھا لە لیستی گرنگیپێدانەکانی لیڤەرپوولیشدایە.
ئەیاکس داوای ٧٠ ملیۆن یۆرۆ دەکات بۆ دەستبەرداربوون لە بەرگریکارەکەی، لەکاتێکدا یانە ئینگلیزییەکان پێیان وایە کە بڕی ڕاستەقینەی گرێبەستەکە لە نێوان ٤٥ بۆ ٥٠ ملیۆن یۆرۆدایە، بەبێ ئەوەی تا ئێستا ھیچ پێشنیارێکی فەرمی پێشکەش بکرێت.
ھاتۆ بە باشی لە ڕۆڵی بەرگریکاری ناوەڕاست و بەرگریکاری چەپدا یاری دەکات، ئەمەش ئەوەیە کە ڕاھێنەری یانە شینەکە ئینزۆ مارێسکا بەدوایدا دەگەڕێت، بەھۆی کەمی ھەڵبژاردەکانی لە لای چەپدا، کە تەنھا ئیسپانی مارک کۆکۆریا لەوێ ئامادەیە، لەگەڵ ئەوەی کە دووانە بن چیلوێڵ و ڕیناتۆ ڤیگا لە لێواری ڕۆیشتندان.
ھەروەھا لیڤەرپوول بە جددی سەیری ھاتۆ دەکات، چونکە یانەکە لەژێر سەرکردایەتی ئارنی سلۆت دەیەوێت خۆی پڕچەک بکات بۆ پاراستنی نازناوی پرێمیەرلیگ، و بەڕێوەبەری وەرزشی ڕیچارد ھیوز سەرسامە بە پڕۆفایلی ھاتۆ، کە ٦ یاری نێودەوڵەتی لەگەڵ ھەڵبژاردەی ھۆڵەندا ئەنجامداوە.
بەرگریکارە گەنجەکە وەرزی ڕابردوو ٥٠ یاری فەرمی لەگەڵ ئەیاکس ئەنجامدا، تێیدا سێ گۆڵی تۆمارکرد، و نازناوی باشترین یاریزانی گەنجی خولی ھۆڵەندای بۆ وەرزی ٢٠٢٤/٢٥ بەدەستھێنا.
گرێبەستی ھاتۆ لەگەڵ ئەیاکس تا ساڵی ٢٠٢٨ بەردەوامە و ھیچ مەرجێکی ھەڵوەشاندنەوەی تێدا نییە.