دوای ئەوەی فلۆرێنتینۆ پێرێز خۆی بۆ پۆستی سەرۆکایەتی یانەی ڕیاڵ مەدرید کاندید کردەوە، جەختی لەوە کردەوە کە هێشتا خواست و وزەیەکی زۆری بۆ کارکردن هەیە.
پێرێز ئاماژەی بەوە کرد کە ٢٦ ساڵ لەمەوبەر بەو ئامانجەوە هاتە ناو خێزانی ڕیاڵ مەدرید کە یانەکە بکاتە باشترین یانەی سەدەی بیست و یەکەم و بەوپەڕی شانازییەوە جەختی کردەوە کە ئەوان لەو کارەدا سەرکەوتوو بوون.
سەرۆکی یانەی شاهانە بە سوپاسەوە ئاماژەی بەوە کرد کە هەموو ئەو دەستکەوتانەی بەدەستهاتوون بەهۆی پشتیوانی هاندەرانەوە بووە و دووپاتیشی کردەوە کە بەرژەوەندییەکانی ڕیاڵ مەدرید هەمیشە لەسەرووی بەرژەوەندی ئەو و هەموو کەسێکی دیکەوەیە، بەشێوەیەک کە ئێستا ڕیاڵ مەدرید لە پێشەنگی جیهاندایە.
سەبارەت بە ئایندەی یانەکە، پێرێز ڕایگەیاند ئامانجیان دروستکردنی پێکهاتەیەکی نایاب و بەهێزە بۆ ئەوەی لە وەرزی داهاتووەوە بگەڕێنەوە سەر ڕێڕەوی بردنەوەی نازناوەکان، بەتایبەتی نازناوی خولی یانە پاڵەوانەکانی ئەوروپا و خولی ئیسپانیا.
لە کۆتایی لێدوانەکەیدا و سەبارەت بە دۆسیەی نێگرێرا، پێرێز بە یەکێک لە مەترسیدارترین دۆسیەکانی جیهانی وەسف کرد و بە سەرسوڕمانەوە وتی کە هیچ کەسێک تێناگات چۆن یانەیەکی وەک بەرشەلۆنە بۆ ماوەی ٢٠ ساڵ پارەی بە لیژنەی ناوبژیوانان دابێت و لە بەرامبەردا هیچ ئەنجامێکی لە بەرژەوەندی خۆیدا بەدەستنەهێنابێت.