لەگەڵ گەشەسەندنی خێرای ئامڕازەکانی ژیریی دەستکردی دروستکەر وەک (ChatGPT، Gemini و Claude)، بیردۆزێک بە ناوی «ئینتەرنێتی مردوو» (Dead Internet Theory) دووبارە سەرنجی جیهانی بۆ خۆی ڕاکێشاوە. ئەم بیردۆزە بانگەشەی ئەوە دەکات کە بەشێکی زۆری ناوەڕۆک، هەژمار، کۆمێنت و بڵاوکراوەکانی ئینتەرنێت ئیتر کاری مرۆڤ نین، بەڵکو لەلایەن ڕۆبۆت و ئەلگۆریتمەکانەوە بەرھەم دەھێنرێن.
شارەزایان ئاماژە بەوە دەکەن کە بەکارهێنانی ڕۆبۆتەکان لەلایەن کۆمپانیاکانی بازاڕگەری و ماڵپەڕەکان بۆ بەرزکردنەوەی بینەر، وای کردووە سنووری نێوان دەقی مرۆڤی و ئامێری کاڵ ببێتەوە. بەپێی توێژینەوەکان، هەستکردنی بەکارهێنەران بە تێکچوونی کواڵێتیی ئینتەرنێت پەیوەندیی بە پڕبوونی تۆڕەکان لە زانیاریی لێکچوو و بەرهەمی ژیریی دەستکردەوە هەیە.
ئەگەرچی پسپۆڕان جەخت دەکەنەوە کە مرۆڤەکان ئینتەرنێتیان چۆڵ نەکردووە و بیردۆزەکە بە مانای وشە ڕاست نییە، بەڵام ئاماژە بە ئاڵنگارییەکی گەورەتر دەکەن: نەبوونی شەفافییەت لە دیاریکردنی سەرچاوەی زانیارییەکان. بەهۆی ئەم نیگەرانییەوە، لە ئێستادا کۆمپانیا تەکنەلۆژییەکان لە هەوڵی گەشەپێدانی ئامڕازێکدان بۆ بەنیشانەکردنی ئەو ناوەڕۆکانەی بە ژیریی دەستکرد بەرهەم دەهێنرێن.