بزووتنەوەی حوسییەکانی یەمەن زنجیرەیەک هێرشی مووشەکییان کردە سەر خاکی سعودیە، ئەمەش دوای ئەوەی شانشینی سعودیەیان تۆمەتبار کرد بە بۆردوومانکردنی فڕۆکەخانەیەکی ژێر دەسەڵاتیان. ئەم پەرەسەندنە سەربازییە کۆتایی بە ئاگربەستێکی نافەرمی هێنا کە بۆ ماوەی چوار ساڵ لە نێوان هەردوولادا بەردەوام بوو.
وتەبێژی هاوپەیمانی سەربازی بە ڕابەرایەتی سعودیە ڕایگەیاند، هێزە بەرگرییەکانیان چەند مووشەکێکیان تێکشکاندووە کە لەلایەن “میلیشیا تیرۆریستەکانی حوسی” بەرەو ناوچەکانی باشووری وڵات ئاڕاستە کرابوون.
لەلایەکی دیکەوە، یەحیا سەریع، وتەبێژی سەربازی حوسییەکان، ڕایگەیاند کە ئەوان فڕۆکەخانەی نێودەوڵەتی “ئەبها”یان لە باشووری سعودیە کردووەتە ئامانج. ئەم هێرشانە یەکەمین چالاکی سەربازی حوسییەکانە دژی سعودیە لە دوای ئازاری ٢٠٢٢ەوە، کاتێک هەردوولا گەیشتبوونە جۆرێک لە هێوربوونەوە.
گرژییەکان بەرەبەیانی ڕۆژی دووشەممە دەستی پێکرد، کاتێک حوسییەکان سعودیەیان تۆمەتبار کرد بە ئەنجامدانی هێرشی ئاسمانی بۆ سەر فڕۆکەخانەی نێودەوڵەتی سەنعا و هەڕەشەی تۆڵەسەندنەوەیان کرد. حوسییەکان ئەو هێرشەیان بە “دەستدرێژییەکی ئاشکرا” ناوبرد و ڕایانگەیاند کە قۆناغی هێوربوونەوە کۆتایی هاتووە.
لەم بارەیەوە، وەزارەتی بەرگری یەمەن (حکوومەتی ناسێندراوی نێودەوڵەتی کە لەلایەن ڕیازەوە پشتگیری دەکرێت) بەرپرسیارێتی لێدانی فڕۆکەخانەی سەنعای گرتە ئەستۆ. وەزارەتەکە ڕایگەیاند، تێکدانی ڕێڕەوی فڕۆکەخانەکە بۆ ئەوە بووە ڕێگری بکەن لە نیشتنەوەی فڕۆکەیەکی ئێرانی کە بەبێ مۆڵەت و بە “بەزاندنی سەروەری یەمەن” دەیویست بنیشێتەوە.
دواتر وتەبێژێکی سەربازی ئاشکرای کرد کە فڕۆکە ئێرانییەکە لە فڕۆکەخانەی شاری “حودەیدە” لەسەر دەریای سوور نیشتووەتەوە، کە ئەویش لەژێر کۆنترۆڵی حوسییەکاندایە.
ئەم پەرەسەندنە سەربازییە هاوکاتە لەگەڵ تێکچوونی ڕێککەوتنێکی ئاڵوگۆڕی دیلەکان کە بڕیار بوو بە نێوەندگیری خاچی سووری نێودەوڵەتی ئەنجام بدرێت. هەروەها بەرپرسانی یەمەنی حوسییەکانیان تۆمەتبار کرد بەوەی فڕۆکەیەکی خاچی سووریان لە فڕۆکەخانەی سەنعا دەستبەسەر کردووە، بەڵام وتەبێژی خاچی سوور ڕایگەیاند کە سەرجەم کارمەند و ستافی فڕۆکەکەیان سەلامەتن.
شەڕی ناوخۆی یەمەن کە لە ساڵی ٢٠١٥ەوە بە دەستێوەردانی هاوپەیمانی عەرەبی گەورەتر بوو، یەکێکە لە خراپترین قەیرانە مرۆییەکانی جیهان. گەڕانەوەی شەڕ و پێکدادانەکان لە کاتێکدایە کە ناوچەکە بەهۆی شەڕی غەززە و ئاڵۆزییەکانی ئێرانەوە لە بارودۆخێکی ناسەقامگیردایە. چاودێران هۆشداری دەدەن کە دەستپێکردنەوەی هێرشەکانی حوسییەکان بۆ سەر سعودیە و گەرووی هورمز، دەبێتە مەترسییەکی گەورە بۆ سەر بازاڕی وزە و هێڵە دەریاییەکانی جیهان.
رۆیتهرز