حەمەی حەمەسەعید، وەزیری رۆشنبیری و لاوانی حكومەتی هەرێمی كوردستان و ئاریان سەلاحەدین، بریكاری وەزارەت سەردانی ئیدارەی سەربەخۆی زاخۆیان كرد، بە مەبەستی بەسەركردنەوەی بەڕێوەبەرایەتییەكانی سەر بە وەزارەت لە سنووری ئیدارەكە.
لە دەروازەی ئیدارەی زاخۆ، شاندی باڵای وەزارەتی رۆشنبیری و لاوان لە لایەن بەڕێوەبەرانی بەڕێوەبەرایەتییەكانی سەر بە وەزارەت پێشوازیان لێكرا.
لە یەكەم وێستگەی سەردانەكەدا، شاندی باڵای وەزارەت، سەردانی بەڕێوەبەرایەتی رۆشنبیری زاخۆیان كرد و لەگەڵ بەڕێوەبەر و فەرمانبەرانی بەڕێوەبەرایەتییەكە كۆبوونەوە، بە مەبەستی بەدواداچوونی پڕۆژە و چالاكییەكانی بەڕێوەبەرایەتییەكە و گوێبیستبوونی داواكاری و پێشنیازەكانیان.
دواتر، وەزیری رۆشنبیری و لاوان و شاندی یاوەری، سەردانی بەڕێوەبەرایەتی كتێبخانەكانی زاخۆیان كرد و لەگەڵ ستافی بەڕێوەبەرایەتییەكە كۆبوونەوە.
یەكێكی دیكە لە وێستگەی سەردانەكە، بەسەركردنەوە و سەردانی بەڕێوەبەرایەتی لاوانی زاخۆ بوو.
لەو چوارچێوەیەدا، وەزیری رۆشنبیری و لاوان و شاندی یاوەری گوێبیستی داواكاری و پێشنیازەكانی بەڕێوەبەر و فەرمانبەرانی بەڕێوەبەرایەتییەكە بوون.
لەو بارەیەوە، حەمەی حەمەسەعید، وەزیری ڕۆشنبیری و لاوان، رایگەیاند، وەزارەت بە ئەركی خۆی دەزانێت خزمەتی زیاتری بواری رۆشنبیری و هونەر و وەرزش لە سنوری ئیدارەی سەربەخۆی زاخۆ بكات و ئاستی خزمەتگوزارییەكانی هاوڕێك بكات لەگەڵ ئەو دەسەڵاتە یاساییەی دراوەتە ئیدارە سەربەخۆكە.
گوتیشی: وەزارەتی رۆشنبیری و لاوان بە بایەخەوە دەڕوانێتە رەوشی رۆشنبیری و گەشەی كولتووری ئیدارەی سەربەخۆی زاخۆ و لە نزیكەوە كار بۆ خزمەتكردنی سنوورەكە دەكەین.
سەبارەت بە داواكارییەكانیش، وەزیری رۆشنبیری و لاوان رایگەیاند، هەموو ئەو داواكاریانەی لە سنوری دەسەڵاتی یاسایی وەزارەتن، جێبەجێ دەكرێن و ئەوانەش كە پێویستیان بە بڕیاری ئەنجومەنی وەزیران هەیە، لە توێی پێشنیاز و راپۆرت بەرز دەكرێنەوە بۆ ئەنجومەنی وەزیران بە مەبەستی بڕیار لەسەر دان و جێبەجێكردنیان.
