فەرەنسا پڕۆژەیاسایەکی ئامادە کردووە کە دەسەڵات بە دادوەران دەدات بە خێرایی دەستوەردان بکەن بۆ سڕینەوەی ئەو پۆست و ناوەڕۆکە ئۆنلاینانەی بە ئەنقەست بۆ چەواشەکاری بڵاو دەکرێنەوە و مەترسی لەسەر ئاسایشی نیشتمانی دروست دەکەن.
بەپێی پڕۆژەیاساکە، بڵاوکردنەوەی ئەنقەستی زانیاریی نادروست سزای تا سێ ساڵ زیندانیکردنی دەبێت، بەڵام ئەگەر سەلمێندرا کە کردارەکە بە هەماهەنگی لەگەڵ لایەنی بیانی یان بۆ بەرژەوەندیی دەرەکی بووە، سزاکە بۆ شەش ساڵ بەندکردن بەرز دەبێتەوە.
ئەم هەنگاوەی پاریس ڕووبەڕووی نیگەرانیی چاودێران بووەتەوە، چونکە لە کاتێکدا ئامانج لێی بەرەنگاربوونەوەی دەستێوەردانی بیانییە، هاوکات ترسی بەرتەسککردنەوەی ئازادیی ڕادەربڕین و ئازادییە مەدەنییەکانیشی لێ دەکەوێتەوە.