وەزیری دەرەوەی ئەمریکا، مارکۆ ڕووبیۆ، ڕایگەیاند کە ئەنجومەنی بەڕێوەبردنی ئەمریکا هەوڵ دەدات ڕۆڵێکی بنیاتنەر لە چارەسەری ململانێی ئۆکرانیا ببینێت و لە چەند هەفتەی داهاتوودا هەنگاوگەلێک دەگرێت بۆ هەڵسەنگاندنی دەرفەتی دەستپێکردنەوەی گفتوگۆکانی ئاشتی.
ڕووبیۆ لە گفتوگۆیەکدا لەگەڵ کەناڵی “فۆکس نیوز” وتی: “سەرۆک دونالد ترامپ بە ڕوونی ئاماژەی کردووە کە ئەمریکا دەتوانێت ڕۆڵێکی کاریگەر لە کۆتاییهێنان بەو جەنگەدا ببینێت و ئێمەش بەردەوام دەبین لە هەوڵدان بۆ ئەو ئامانجە.”
ئەو هەروەها جەختی کردەوە کە واشینگتۆن هەمیشە ئامادە بووە ڕۆڵێکی ئەرێنی و بنیاتنەر لەم پرۆسەیەدا بگێڕێت.
بەپێی ڕووبیۆ، لە ماوەی چەند هەفتەی داهاتوودا هەوڵ دەدرێت بۆ ئەوەی بزانرێت ئایا دەکرێت گفتوگۆکان لەنێوان هەردوو لایەن دووبارە دەستپێبکرێن بۆ کۆتاییهێنان بە شەڕەکە. ئەو ئاماژەی بەوەش دا کە هەردوو لا لە هەندێک بابەتدا “هێڵی سووری” توندیان هەیە و ئەگەر ئەو هێڵانە لە یەکتر نزیک نەکرێنەوە، گەیشتن بە چارەسەری ئاشتی ئاسان نابێت، بەڵام ئەمریکا ئامادەی هەنگاونانە.
ڕووبیۆ لە کۆتاییدا وتی، ترامپ ڕێنمایی بە ئەندامانی بەڕێوەبردنی خۆی کردووە کە: “هەر کات دەرفەتێک بۆ پێشخستنی گفتوگۆکانی ئاشتی هەبوو، دەبێت سوودی لێ وەربگرین.”