فەرماندەیی ناوەندی هێزەکانی ئەمریکا (سێنتکۆم) ڕایگەیاند لە چوارچێوەی توندکردنەوەی گەمارۆ ئابوورییەکان بۆ سەر تاران، لە تەمووزی ڕابردووەوە تاوەکو 21ی ئاب ڕێڕەوی 68 کەشتیی بازرگانییان وەرچەرخاندووە و ڕێگرییان لە چەندین کەشتیی تری ئێرانی لە گەرووی هورمزدا کردووە.
بەپێی ڕاگەیەندراوێکی فەرمیی سێنتکۆم، هێزەکانی ئەمریکا لەو ماوەیەدا 3 کەشتییان دەستبەسەر کردووە و چوونەتە سەر 2 کەشتیی تر. ئەم پێشهاتانە دوای ئەوە دێن کە هەوڵە دیپلۆماسییەکان و ڕێککەوتنەکانی ئاگربەست بەتەواوی هەرەسیان هێنا و واشنتن لە 13ی تەمووزەوە خولێکی نوێی گەمارۆ توندەکانی بۆ سەر بەندەرە ستراتیژییەکانی ئێران دەستپێکردەوە.
ئامانجی سەرەکی لەم ڕێکارە سەربازی و دەریاییانە، بڕینی شادەماری داهاتی نەوتی ئێران و ڕێگریی دەستبەجێیە لە گەیشتنی دراوی بیانی بۆ تاران.
ئەم گوشارە دەریاییانەی ئەمریکا لە کاتێکدایە کە کەرتی وزە و ژێرخانی ئابووریی ئێران لە ئەنجامی جەنگ و ئاڵۆزییە هەرێمییەکانی دوایی بەرکەوتەی زیانی زۆر گەورە بووەتەوە، ئەمەش گەمارۆدانەکە ئاڵۆزتر و بارودۆخی دارایی تاران سەختتر دەکات.