دۆناڵد ترامپ، سەرۆکی ئەمریکا، هەڕەشەی ئەوەی کردووە کە واشنتن فشارێکی زۆر قورس لەسەر ئابووری ئێران دروست دەکات، لە کاتێکدا سکۆت بێسەنت، وەزیری خەزێنەی ئەمریکا، ڕایگەیاندووە کە ئەمریکا بە زوویی ڕێوشوێنێکی «بێوێنە» دژ بە تاران دەخاتەڕوو.
بەپێی ئەوەی ڕاگەیەنراوە، بێسەنت دووشەممە لە کاتژمێر ٢ی دوای نیوەڕۆ بە کاتی ڕۆژهەڵاتی ئەمریکا، کۆنفرانسێکی ڕۆژنامەوانی دەبەستێت و وردەکارییەکانی ئەو بڕیارانە ئاشکرا دەکات.
ئەمریکا، نەتەوە یەکگرتووەکان و یەکێتیی ئەوروپا لە ساڵانی ڕابردوودا کۆمەڵێک سزا و سنوورداریی بازرگانییان لەسەر ئێران داناوە، لەوانەش بەستنەوەی سامانەکان، بەهۆی بەرنامەی ناوکی، پێشێلکردنی مافەکانی مرۆڤ و پشتگیری لە گرووپە چەکدارەکان.
لە ماوەی دوایین شەڕەکەشدا، واشنگتن سزا و فشارەکانی خۆی لەسەر بواری وزە، کەشتیوانی و دارایی فراوانتر کردووە و هەروەها دەست بە گەمارۆی دەریایی ئێران کردووە.
داتاکانی ئۆفیسی کۆنترۆڵی سامانە بیانییەکان لە وەزارەتی خەزێنەی ئەمریکا نیشان دەدەن کە لە سەرەتای دەستپێکردنی دەورەی دووەمی ترامپەوە، زیاتر لە هەزار کەس، کەشتی و فڕۆکە خراونەتە لیستی سزا.
لە نوێترین هەنگاوەکاندا، ئەمریکا ئامانجی نەوتی ئێران، کۆمپانیاکانی بیمەی و ئەو کەس و دامەزراوانەی کە یارمەتی ئێران دەدەن بۆ بەدەستهێنانی چەک کردووە. هەروەها هەندێک بۆرسە و دامەزراوەی دیجیتاڵی کراونەتە ئامانجی سزا.
ئێران بە توندی دژ بە پلانی نوێی ئەمریکا و سزادانە ئەم فشارانە لە کاتێکدا زیاد دەکرێن کە ئابووری ئێران لەژێر کاریگەریی سزا و کێشەکانی دیکەدا روبەروی فشارێکی گەورە بۆتەوە.
یەکێک لە هەڵبژاردەکانی واشنگتن بۆ زیادکردنی فشار، ئامانجگرتنی پاڵاوتنەوە نەوتییە سەربەخۆکانی چینە کە بە ناوی «چایخانە» ناسراون.
ئەم پاڵاوتنەوانە بەشێکی گرنگ لە توانای پاڵاوتنی نەوتی چین پێکدەهێنن و بەشێکی بەرچاوی نەوتی ئێرانی کە دەچێتە چین لەلایەن ئەوانەوە دەکرێتەوە.
بەپێی داتاکانی کۆمپانیای شیکاری کێپلەر بۆ ساڵی ٢٠٢٥، چین زیاتر لە ٨٠ لە سەدی هەناردەی نەوتی ئێران دەکڕێت. بەم هۆیەش، پاڵاوتنەوە سەربەخۆکانی چین دەتوانن ببنە ئامانجی «سزای لاوەکی»ی ئەمریکا؛ واتە سزا دان بەو کەسان و کۆمپانیا و دامەزراوانەی کە لەگەڵ لایەنێکی سزادرابوو مامەڵە دەکەن.
هەرچەندە سزا پێشووترەکانی ئەمریکا وای کردووە هەندێک پاڵاوتنەوە گەورەکانی چین لە کڕینی نەوتی ئێران دووربکەونەوە، بەڵام شارەزایانی بواری سزا پێیان وایە پاڵاوتنەوە سەربەخۆکان تا ڕادەیەک پارێزراوترن، چونکە پەیوەندیی کەمتر لەگەڵ سیستەمی دارایی ئەمریکا هەیە.