باڵوێزی ئەمەریکا لە عێراق ، ڕایده‌گه‌یه‌نێت، هەرێمی کوردستان نموونەی دیموکراسییە و دروستکردنی کونسوڵخانەیەکی گەورە لە هەولێر نیشانەی پابەندیی ئەمەریکایە بە پەیوەندییەکانی لەگەڵ هەرێمی کوردستان، چونکە پەیوەندییەکانی هەرێمی کوردستان و ئەمەریکا یەکلایەنە نییە، بەڵکو دوولایەنەیە.
ئەلینا ڕۆمانۆوسکی، باڵوێزی ئەمەریکا لە عێراق، ئەمڕۆ سێشەممە 29ی تشرینی یەکەمی 2024 لە دیداری ئینستیتیوتی مێری، له باره‌ى هه‌رێمی كوردستانه‌وه، ڕایگه‌یاند: “هەرێمی کوردستان سەرچاوەیه‌كی گرنگە بۆ به‌شێك لە بازرگانی و وەبەرهێنانی ئەمەریکا لە ته‌واوى عێراق”.
باڵوێزه‌كه‌ى ئه‌مریكا له عێراق، گوتیشی: “ئه‌م هه‌رێمه هاوکات نموونەی دیموکراسییە و دەکرێت لە عێراقیش پەرەی پێ بدرێت”. ئاماژه‌ى به‌وه‌ش دا، ڕێژەی بەشداریی دەنگدەران لە هەڵبژاردنی 20ی ئۆكتۆبه‌ر ئەوەی سەلماند كه هەر بۆیە پەیوەندیی ئەمەریکا و هەرێمی کوردستان یەکلایەنە نییە، بەڵکو دوولایەنەیە.
هه‌رچى سه‌باره‌ت بە عێراقیشه، باڵوێزی ئەمەریکا، ڕه‌تیكرده‌وه هێزه‌كانیان بەشدارییان لەهێرشەکانی ئیسرائیل بۆ سەر ئێران كردبێت، گوتیشی: “کۆنترۆڵی ئاسمانی عێراق لە دەست ئێمەدا نییە.”
له درێژه‌ى قسه‌كانیدا هاته سه‌ر باسى تیرۆر و گوتی: “له ڕووبه‌ڕووبوونه‌وه‌ى داعشدا، هێزە ئەمنییەکانی عێراق، بەهێزەکانی کوردستانەوە، بەرەوپێشچوونی باشیان بەخۆیانەوە بینیوە، ئەمەش ئەرکێک بوو کە بەر لە 10 ساڵ، هێزەکانی ئەمەریکا لەپێناویدا بانگهێشت کران.”
ڕۆمانۆوسكی، گوتیشی: “عێراق ڕۆڵی گەورەی لەسەقامگیریی ناوچەکە هەیە، بۆیه دەمانەوێت سەقامگیر و سەربەخۆ بێت، هه‌روه‌ك دەشمانەوێت سەرجەم هێزەکانی عێراق لەژێر کۆنترۆڵی فەرماندەیی گشتی هێزە چەکدارەکاندا بن.”
ئەمڕۆ سێشەممە لە هەولێر دیداری ئینستیتیوتی مێری 2024 بە ناونیشانی (بەرەو حوكمڕانیی دروست و خۆشگوزەرانی) چالاکییەکانی دەستی پێ کرد و بڕیاریشه دوو ڕۆژ بەردەوام بێت.